Eibar nagusi izan da lehen zatian. Ongi lotu du Espanyol, eta talde kataluniarra ez da gai izan Dmitrovicen ate inguruan arriskua sortzeko. Armaginen nagusitasunak uzta eman du 33. minutuan. Pedro Leonen erdiraketa bat sareetara bidali du Lombanek, buruz. Atzelariaren lehen gola izan da Eibarrekin.
Bigarren zatian, suspertuago zelairatu da Espanyol, eta Eibarren zelaian gehiago jokatzen saiatu da. Gol aukerak izan dituzte, Gerard Morenoren eta Sergio Garciaren eskutik. Espanyolek gertu izan du banakoa. Eibarrek eutsi egin dio, ordea, kataluniarren gorakadari. Dmitrovicek behin baino gehiagotan eragotzi du berdinketa.
Armaginek ere izan dute gol aukerarik. Alejok jaurtiketa gurutzatua eta indartsua egin du arearen ertzetik, 63. minutuan, baina kanpora joan zaio. Kike Garciak gertu izan du armaginen bigarrena, 81. minutuan, baina ez du asmatu Alejoren erdiraketa atera errematatzen.
Azkenean, 0-1 amaitu da norgehiagoka eta Eibarrek hiru puntuak eraman ditu etxera. Era horretan, azken jardunaldietako bolada txarra etetea lortu du Mendilibarren taldeak. Sei partida zeramatzan irabazi gabe.
