Aurkeztu dute Espainiako Itzulia, eta zurrumurrua baieztatu da. Bi etapa oso Euskal Herritik igaroko dira, hamaikagarrena eta hamabigirrena, hain zuzen ere. Lehena, irailaren 4ean, Donapaleutik abiatuko da eta Urdazubin amaitu (169 km), eta besteak, hurrengo egunean, Los Arcoseko zirkuituaren eta Bilboren (175 km) arteko bidea egingo du. Irailaren 6koa, gainera, 13.a, Bilbotik abiatuko da, eta ibilbideraren erdia Euskal Herritik egin eta gero, Los Machuecoseko mendatean amaituko da (Kantabria). Aurtengo aldian etapa bat korritu zen Euskal Herrian, Getxo eta Oiz mendiaren artean, eta bertan Michale Woods (EF) nagusitu zen.
Vuelta abuztuaren 24an abiatuko da Torrevellatik, eta irailaren 15ean amaituko da Madrilen. Tropelak 3.272 kilometro egin beharko ditu. Guztira mendiko zazpi etapa izango dira. Hiru izango dira, hain zuzen ere, 2019ko Vueltaren interesgune nagusiak: Andorrako etapa, lehen atseden egunaren aurretik; Asturiaseko bi amaiera berriak, 15. eta 16. etapetan; eta Avilan jokatuko den azkenaurreko etapa erabakigarria. Horretaz landa, bi erlojupeko egongo dira, bata taldekakoa, 18 kilometrokoa, probari hasiera emateko, Torrevellan, eta bestea banakakoa, 10. etapan. 36 kilometro izango ditu, eta Pauen (Frantzia) jokatuko da. Aurreko urtean Simon Yates izan zen Vueltako garailea (Mitchelton Scott).
