Lan bikaina egin du euskal selekzioak Pilotako Nazioen Ligan, eta horren erakusle da lortutako domina sorta. Gustura egoteko moduan dira. Sei final jokatu dituzte gaur, eta, larruzko paleta modalitatean izan ezik, beste guztietan aritu dira euskal selekzioko pilotariak: hiru urre lortu dituzte, eta bi zilar. Hain zuzen, urrea lortu dute gizonezkoen eskuz banakakoan, emakumezkoen eskuz banakakoan eta emakumezkoen eskuz binakakoan, eta zilarra gizonezkoen eskuz binakakoan eta pilota egokituan. Horri atzo lortutako dominak gehitu behar zaizkio: urrezkoa gizonezkoen zesta-puntan, eta zilarrezkoak gizonezkoen pala motzean eta emakumezkoen zesta-puntan. Denera, beraz, honela bete dute poltsa: lau urre eta lau zilar. Larruzko paleta modalitatean bakarrik geratu dira dominarik gabe.
Euskal selekzioak ez du ondo hasi eguna, gizonezkoek galdu egin baitute eskuz binaka Espainiaren aurka (0-2). Beñat Azketak eta Unax Landak jokatu dute lehen seta (8-10), eta bigarrengoan Aingeru Bernaola sartu da Landaren ordez (2-10). Ezin izan dute ezer egin, ordea, Espainiako selekzioarekin jokatu duten Oian Canabal eta Unax Apeztegia nafarren kontra. Lehen setean lehia estuagoa izan dute, baina bigarrengoan aiseago aritu dira aurkariak. Hortaz, zilarrarekin konformatu behar izan dute. Finala jokatu ez arren, Beñat Zubizarretak ere jantzi du domina.
Eskuz binaka ezin, baina bai banaka. Euskal selekzioak 2-1 irabazi du Espainiako selekzioaren aurka. Eñaut Lizeagak urduri hasi du partida, eta kostatu zaio finalari neurria hartzea. Lehen seta 4-10 galdu du Espainiako selekzioko Fermin Arribillaga pilotariaren aurka. Itxura txarra zuen kontuak, baina azkar eman dio buelta. Bigarren seterako lortu du konfiantza, eta irauli finala: 10-4 nagusitu da. Hirugarren set erabakigarria, berriz, 5-1 irabazi du, ikusgarri arituta. Lizeagak 3-0koa egindakoan, Oscar Lerena kantxaratu da Arribillagaren ordez, baina hark ere ez du gelditu euskal selekzioko pilotariaren joa. Lizeagarekin batera, Gaizka Carregal ere aritu da Nazioen Ligan, eta hark ere urrezko domina zintzilikatu du lepoan.
Pilota egokituan, berriz, euskal selekzioak 0-2 galdu du Frantziakoren aurka. Hala ere, German Elkorok eta Beñat Lizasok lanak eman dizkiote Frantziako selekzioko Yann Meunier eta Maxime Cabanne pilotariei. Lehen seta 15-5 bukatu da, baina estu hartu dituzte bigarrengoan, ederki arituta. Azkenean, 15-13 galdu dute. Nazioen Liga hasi aurretik, Lizasok BERRIAri adierazi zion Frantzia zela urrezko domina janzteko faborito nagusia, baina saiatuko zirela ezustekoa ematen. Ez dute lortu, baina ondo lehiatu dira. Haiekin batera, Aingeru Senperenak eta Sergio Rodriguezek jokatu dute txapelketa.
Gaizki hasitakoa, ondo bukatu
Euskal selekzioak eguna kaxkar hasi badu ere, bikain bukatu du. Emakumezkoek urrezko dominak lortu dituzte eskuz banakakoan eta binakakoan, Espainiaren aurka biak.
Hain zuzen, Enara Gaminde pilotariak 2-0 irabazi du Espainiako selekzioko Laia Salsamendiren aurka. Gamindek abiadura handia eman dio pilotari, eta jokoan nagusi izan da. Lehen seta 10-5 irabazi du. Bigarrengoan ere segida eman dio lehen seteko lanari, baina kostatu zaio partidako azken tantoa egitea. Hala ere, 10-7 gailendu da, merezita. Ligaxkan ere jokatu zuten elkarren aurka, eta neurketa hartan Salsamendi izan zen nagusi, 2-0. Bestelako kolorea izan du finalak. Lehiaketan Maddalen Etxegarai izan du kide Gamindek, eta, finala aulkitik ikusi badu ere, urrezko dominaren irabazle da hura ere.
Segidan, beste final bat jokatu du Gamindek, binakakoa. Arazo fisikoak izan ditu, aurreko neurketako nekeak eragindakoak. Hala ere, eutsi egin dio, eta nola. Gamindek eta Olatz Arrizabalagak 2-0 irabazi dute Espainiako selekzioko Goiuri Zabaletaren eta Andrea Capellanen kontra. Gaminderen giharretako arazoak tarteko, estu hartu dituzte euskal selekzioko jokalariak neurketaren hasieran. Joera arriskutsua hartzen hasia zen finala, 3-6 eginda aurretik jarri baitira Espainiako selekzioko pilotariak. Baina kito. Osatzen hasi da Gaminde, eta agintzen Arrizabalaga. Eta halaxe segitu dute bukaerara arte. Lehen seta 10-8 irabazi dute, eta bigarrena 10-1. Amaia Aldairekin eta Nagore Agirrerekin batera ospatu dute garaipena, taldean, elkar besarkatuta. Itxiera polita eman diote Pilotako Nazioen Ligari. Irribarretsu igo dira podiumera euskal selekzioko pilotariak, Euskal Herriak erabaki dioen ikurrina eskuetan.
