Azkoitian eman zitzaion atzo hasiera eskupilotako binakako txapelketari. Bost egun geroago, aurrez aurre ziren berriz ere lau eta erdiko txapelketako bi finalistak. Ezkurdiak, oraingoan Martija lagun zuela, Altuna III.a garaitu zuen berriz ere. Ladis Galarzaren laguntza ez zen nahikoa izan Jokin Altunak igandeko zapore garrantza kentzeko.
Aurrelariek, aurreko astean erakutsi bezala, duten defentsaren erakustaldi bat egin zuten Gurea frontoian. Altuna III.ak Ezkurdiak ateratako 22 sakeetatik hamasei erantzun zituen airez. Partida hasiera bikote urdinarena izan zen, 0-4 nagusi hasita. Gorriak, ordea, berehala gerturatu ziren, 5-7 lehenik, eta 9-11 ondoren. Hortik aurrera, ez Ezkurdiak, ez Martijak, ez zuten huts bakar bat ere egin, eta 12-11 aurreratu ziren lehen aldiz. Partidu orekatua izan zen, hamalauan berdindu zuten arte. Ladisek hiru pilotakada huts egin zituen lau tantoan, eta gorriek garaipenerako bidea hartu zuten. Markagailuan 13-14 galtzen joatetik, 20-14 irabaztera igaro ziren Ezkurdia eta Martija. Atzean fin ibili zen Etxeberriko (Nafarroa) atzelaria, eta 21-15 jarritakoan, partida erabakita geratu zen. Hortik 22-17ra. Txapelketako lehen garaipena Ezkurdia-Martija bikotearentzat, beraz.
