Frank Vandenbrouckeren heriotzak jota utzi du Belgika

Frank Vandenbroucke 34 urteko txirrindulari belgikarra hilda topatu zuten atzo Senegalgo hotel bateko logelan, eta ordutik Belgika txirrindulari mirariaren heriotza ezin sinestu dago. Vandenbroucke oporretan zegoen, eta lehen azterketen arabera biriketako enbolia baten ondorioz hil zen. Denboraldi honetan txirrindularitza utzi zuen.

1993. urtetik profesionalen mailan zegoen Vandenbroucke eta guztira 54 lasterketa irabazi zituen. Hasierako urteetan mundu mailako txirrindularitzako esperantza gaztea izan zen, adituen arabera.

Hala ere, dopatze kasuetan murgilduta egon zen txirrindularia, liburu bat ere idatzi zuen drogekin izan zuen esperientzia kontatuz. 2007. urtean bere buruaz beste egiten saiatu zen, haren psikologoaren ustez, belaunean zeukan lesioa izan zen bizia kendu nahi izateko arrazoia.