FUTBOLA. ESPAINIAKO LIGA. BIGARREN MAILA. Alavesek 2-2 berdindu du Celtaren aurka, partida gogorrean

Alavesek puntu ona eskuratu zuen atzo Vigon, Celtaren aurka 2-2 berdinduta. Gasteizko taldeak ez zuen partida ona egin, baina emaitza ona lortu zuen. Chuchi Cosen taldeak bolada onean segitzen du bost partida galdu gabe, eta sailkapeneko lehen postuetanjarraitzen du, tinko. Ez zuten batere ondo hasi partida gasteiztarrek. Zelaian kokatzeko astirik gabe, Celtak gola egin zuen, Vryzas aurrelari greziarraren bidez. Ez zen hor geratu Alavesen zorte txarra, hamar minutura Vryzasek berriro zulatu baitzuen Bonanoren atea.

Gasteiztarrak ez ziren behera etorri. Azkar suspertu ziren, eta 19. minutuan gola egin zuten, Ruben Navarrok. Alaves gero eta hobeto ari zen zelaian, eta atsedenaldira iritsi aurretik berdinketa lortu zuen, De Lucasek penaltiz. Bigarren zatian partida erabat zakartu zen epaileak Celtako Angel eta Mendez kanporatu zituen. Bi taldeek gola egiteko aukera garbiak izan zituzten De Lucasen jaurtiketa batek langa jo zuen, eta Bonanok penaltia gelditu zion Sanchezi, baina markagailua ez zen aldatu.

Etxetik kanpoko lehen garaipena nahi du Eibarrek

Eibarrek, berriz, Elxi egingo dio bisita. Jose Luis Mendilibarren taldeak helburu argia du: punturen bat urratu, ahal bada, jokoan dauden hirurak.Lortuz gero, etxetik kanpoko lehen garaipena litzateke, eta orain dela bi aste Ejidon jasotako jipoia (4-1) behin betiko atzean uzteko balioko luke. Eibartarrek ez dute lan erraza izango. Elxek talde indartsua du, Lehen Mailan eskarmentu handia duten jokalariekin: Unanua, Otero, Peragon, Turiel, Alfredo, Moises...

Ezustekorik ezean, Mendilibarrek joan den larunbatean Ipuruan Kordobari 1-0 irabazi zion talde bera zelairatuko du Martinez Valero zelaian. Mendilibarrek, hala ere, ez du baztertzen azken unean aldaketaren bat egitea. Paul Abasolo bizkaitarra da berrikuntza nagusia deialdian. Erdilari gazteak bi gol egin zituen asteazkenean, Lemoaren aurkako lagunartekoan, eta Mendilibarrek merezitako saria eman dio.