Gernika-Ordizia kopako finalerdietako itzuliko partida jokatuko da gaur

Kopako finala egongo da jokoan. Sari potoloa. Ezustean, Bizkaia Gernikak eman zuen lehen kolpea, orain hilabete pasatxo, Ordizian 23-26 irabazita. Baina krisi hotsak ahaztu ezinik jarraitzen dute bizkaitarrek; atzerritar gehienak joan ondoren, taldea berregituratzeko lan zailean murgilduta daude Gernikakoak. Gehiegizko konfiantzarekin, ziurrenik, joanekoan aurkariaren arazoek kalte egin zieten gipuzkoarrei, eta askoz sendoago jokatu beharko dute gaur (17:00) kanporaketa iraultzeko. Goierritarrek, bereziki, jokalari asko dauzkate kili-kolo. VRAC Quesos Entrepinares ligan lidergoan dagoen taldea zain dago finalean —Santanderren (Espainia) jokatuko da ziurrenik—.