Hegoafrikak eta Mexikok bana berdindu dute estreinakoan

Hegoafrika 1-Mexiko 1 (1-0: Tshabalala, 54m. 1-1: Marquez, 78m).

Ez da joko erakargarririk ikusi, baina emozio eta intentsitate handiko partida izan da Munduko Kopako estreinakoa. Hegoafrikak eta Mexikok 1-1 berdindu dute. Bidezko emaitza izan da, baina etxeko taldeak partida irabazteko aukera izan du 89. minutuan. Mphelaren jaurtiketak zurtoinean jo du, ordea. Hegoafrikarrek sartu dute Munduko Kopako lehen gola - Tshabalalak 54. minutuan-, eta Mexikok 78. minutuan berdindu du -Marquezek-.

Lehen zatian Mexiko izan da nagusi hasiera hasieratik. Giovanni Dos Santosek gola sartzeko bi aukera garbi eduki ditu -bata norgehiagoka hasi eta berehala-, baina ez du zorterik izan Bartzelonako aurrelari oihak. 37. minutuan korner baten ondoren gola sartu dute mexikarrek, baina epaileak baliorik gabe utzi du. Handik gutxira Guille Franco aurrelariaren burukada kanpora joan da gutxigatik. Hegoafrikak lehen zatiko azken mintuetan estutu du Mexiko, kontraerasora jokatuz.

Gola eta zoramena

Bigarren zatian etorri dira golak. 55. minutuan Tshabalalak aitzinetik paratu du etxeko taldea, eta zoramena lehertu da Soccer City estadioan. Dantza berezia eginez ospatu dute gola Hegoafrikako jokalariek.

Mexikok ez du eman amore, hala ere. 59. minutuan Giovanni Dos Santosek gola sartzeko bertze aukera garbi bat eduki du, baina bere jaurtiketa gogorrari erantzun bikaina eman dio Khune atezainak. Azkenean, 78. minutuan jaso dute saria amerikarrek. Rafa Marquez Bartzelonako jokalariak bigarren zurtoinean jaso du baloia, eta bere jaurtiketak Khune gainditu du.

Partida irabazteko aukera bikaina izan du, baina, Hegoafrikak. Mphela bakarrik gelditu da Oscar Perez atezainaren aitzinean, baina zurtoinera bota du baloia. Azkenean, beraz, puntu banaketa A multzoko lehenbiziko partidan.

Hamaikakoak

Hegoafrika. Itumeleng Khune, Siboniso Gaxa, Aaron Mokoena, Siphiwe Tshabalala, Katiego Mphela, Steven Pienaar, Teko Modise, Reneilwe Letsholonyane, Kagisho Dikgacoi, Lucas Thwala eta Bongani Khumalo.

Mexiko. Perez, Rodriguez, Osorio, Salcido, Juarez, Marquez, Aguilar, Torrado, Giovanni Dos Santos, Franco eta Vela.