Eusko Legebiltzarrean kirolaren inguruko indarkeria aztertu dute gaur, eta klubengan jarri dute fokua. Indarkeriazko jarduerak dituzten zaleak beraien "masa sozialaren" parte izatea saihesteko neurriak hartzeko eskatu diete legebiltzarkideek taldeei. Horretaz gain, Legebiltzarrak Jaurlaritzari eskatu dio klubei emateko aholkuen txosten bat egiteko. Onartu duten testuak dio partidetako istiluen gaia ez dela Jaurlaritzaren esku bakarrik utzi behar. Haren arabera, klubek, federazioek, UEFAk eta Europako Batasunak ere inplikatu egin behar dute.
Otsailaren 22an Spartak Mosku eta Athleticen arteko partidan izandako istiluen ostean —Inocencio Alonso ertzaina hil zen han—, Elkarrekin Podemosek eta PPk idatzi bana aurkeztu zuten, eta gaur eztabaidatu dituzte, Olympique eta Athleticen arteko partidako istiluen biharamunean.
PPk aurkeztutako testua onartu dute, EAJk, PSE-EEk eta PPk emandako botoekin. EH Bildu eta Elkarrekin Podemos abstenitu egin dira. Bi alderdi horiek Elkarrekin Podemosen testua defendatu dute.