Golegileen Munduko Kopa izaten ari da hau. Messi, Mbappe, Halland... eta, gaurkoan, Harry Kane. Aurrelariak partidako azken ordu laurdenean sartutako bi goli esker—lau daramatza txapelketan—sailkatu da Ingalaterra final-zortzirenetarako. 2-1 irabazi dio Kongori. B. Afrikako selekzioak ausart jokatu du, eta ia neurketa osoa egon da aurretik. Itxura oso ona eta duina eman du, batez ere lehen zatian. Bigarrenean, ordea, Ingalaterrak estutu egin du erdiraketak eginez, atzean sartu du, eta azkenerako merezita egin du aurrera. Final-zortzirenetan Mexikoren aurka neurtuko ditu indarrak, asteartean, hilaren 7an, goizaldeko ordubietan.
Kongoko hautatzaileak, Sebastien Desabrek, marrazkia aldatu du. Atzean lau atzelarirekin jokatu du, bostekin beharrean. Goian, berriz, hiru jokalari oso bizkor jarri ditu: Copenga, Wissa eta Mbuku. Horren ezustean harrapatu du Ingalaterra. Afrikako selekzioaren plana argia zen: aurkariari jokoaren ekimena eta baloiaren jabetzea utzi, eta ahal zuenean zuzen eta bizi aurrera atera. Apostua bikain atera zaio. Izan ere, 7. minutuan aurretik jarri da. Pazientziaz mugitu dute baloia, Bissakari iritsi zaio, eta hark bigarren zutoirena erdiratu du. Han bakarrik azaldu da Cipenga, eta gola sartu du. Baloia zutoinetik oso gertu igaro da, baina Pickfordek ezin izan du geratu.
Ingalaterra deseroso aritu da hurrengo minutuetan. Partida amaitzeko asko geratu arren, presaka jokatu du, eta akatsak egin ditu paseetan, kontroletan... Kongok, berriz, ausart jokatzen jarraitu du, eta ahal izan duen guztietan bizi jo du gora. Baina 30. minutua bete aurretik berriro ere estutu egin du Tuchelek zuzentzen duen multzoak. Hala, 29. minutuan norgehiagoka berdintzeko aukera argia izan dute. Ricek baloia erdiratu du eskuinetik, eta atzetik etorrita erremate bikaina egin du Bellinghamek; Mpasi atezainak, ordea, gelditu bikaina egin du. 35. minutuan, berriz, Rashfordek bigarren zutoian egindako errematea golaren arrastoan atera du Bissaka atzelariak.
Kongo ez da kikildu, eta lehen zatiko azken minutuak joan eta etorrikoak izan dira. Desabrek zuzentzen duen selekzioa aldea handitzear egon da 42. minutuan: Bissakak berak erdiraketa egin du lehen zutoinera eta errematea egin du Wissak. Boloiak O'Rileyren eta Pickforden gorputzea jo du, eta zutoinera joan da. Hurrengo jokaldian Kane bakarrik geratu da Mpasiren aurrean, eta atezainak penaltia egin diola eskatu du. Baina VARean begiratu ostean, epaileak ez du adierazi. Lehen zatiko luzapenean Kanek bi aukera argi izan ditu berdinketa lortzeko, baina berriro ere Mpasi azaldu da. Horrenbestez, Kongo aurretik joan da atsedenaldira.
Ingalaterra oso nagusi
Bigarren zati hasieran ere Mpasi izan da protagonista. Le Havre taldeko atezainak hiru partida baino ez ditu jokatu hasieratik denboraldi honetan Frantziak Ligan. Baina Munduko Kopa bikaina egin du. Multzoen fasean partida oso onak jokatu zituen baita ere Portugalen eta Kolonbiaren aurka. Hala, 51. minutuan gelditu bikainak egin dizkie Kaneri eta Bellinghami. Ekinean jarraitu du Ingalaterrak, hegaletatik erdiraketak eginez. Kongo atzean sartu da erabat.
Touchelek arriskatu beharra zuen, eta aldaketak egin ditu horretarako. Besteak beste Eze sartu du Spenceren tokian, eta Rice atzealdeko eskuin hegalean jarri du. Azkenean 74. minutuan sartu du Ingalaterrak berdinketaren gola. Kanek sartu du buruz, nork bestela. Gordonen erdiraketa on bat baliatuz izan da. Kongok ez du behar bezala zaindu jokaldi hori, nekea antzeman zaie jokalariei. Europako selekzioak ondo mugitu du baloia alderik alde, eta Andersonek gertu izan du bigarrena. Arearen ertzetik bikain jaurti du, baina gurpil handiegia eman dio, eta gutxigatik kanpora joan da.
Azkenean 86. minutuan iritsi da Ingalaterraren bigarren gola. Berriro ere Kanek sartu du. Gordonek baloia jaso du area ertzen, Kaneri utzi dio, eta hark bitan pentsatu gabe buelta eman, eta sareetara bidali du baloia. Ikusgarria izan da gola. Kongo saiatu da berdinketa lortzen falta ziren minutuetan. Partidako azken aukera harena izan da, are ertzetik jaurtitako falta batean. Baina Wissaren errematea kanpora joan da gutxigatik.
