Ingalaterrako eta Argentinako selekzioek Munduko Kopako bigarren finalerdia jokatuko dute gaur, Atlantan (AEB), 21:00etan (La1 eta M6). Biek dute helburu bera: finalerako sailkatzea. Ingelesek duela hirurogei urte jokatu zuten azkenekoz finala, etxean jokatu eta irabazi zuten ekitaldian. Argentinarrak, berriz, duela lau urte aritu ziren finalean, Qatarren, eta txapeldun izan ziren.
Biek sufritu dute finalerdietara iristeko, luzapena jokatu behar izan baitzuten final-laurdenetan: Ingalaterrak 2-1 irabazi zion Norvegiari, eta Argentinak, 3-1 Suitzari. Gaur egungo txapeldunak gorriak ikusi ditu kanporaketetan. Final-hamaseirenetan, luzapenean hartu zuen mendean Cabo Verde (3-2). Final-zortzirenetan, berriz, ez zuen luzapena jokatu, baina gogotik sufritu zuen Egiptori nagusitzeko. 78. minutuan, bi golen aldea zuten egiptoarrek, baina azken txanpan, argentinarrek emaitza irauli, eta 3-2 irabazi zuten.
Ingalaterrak ere izerdia bota behar izan du kanporaketetan. Final-hamaseirenetan, estu eta larri irabazi zion Kongoko Errepublika Demokratikoari. Afrikako selekzioak sartu zuen lehen gola, baina ingelesek irauli egin zuten emaitza azken ordu laurdenean, Kanek sartutako bi goli esker. Final-zortzirenetan, berriz, 3-2 hartu zuten mendean Mexiko.
Ingalaterra eta Argentina finalerdietara iritsi badira, zenbait jokalarik egindako lanari esker iritsi dira. Ingelesen artean Bellingham eta Kane nabarmendu dira: seina gol sartu dituzte. Argentinarren artean, nola ez, Messi nabarmendu da: zortzi gol sartu ditu.
Bi selekzioek bost aldiz jokatu dute elkarren aurka Munduko Kopan: hiru aldiz nagusitu dira ingelesak, behin argentinarrak, eta beste behin berdindu egin zuten. Berdindu egin zuten aldi hura izan da kanporaketetan jokatu duten aldi bakarra, 1998ko Frantziako ekitaldian, final-zortzirenetan, eta Argentina sailkatu zen.
