"Bidea arriskutsuegi aurkitu dute haize gogorragatik. Beherantz doaz. Berri gehiago hurrengo orduetan. Ondo daude", halaxe jakinarazi zuten atzo Gasherbrum IIrako (8.035 m) bidea uztea erabaki zutela. Eguraldiak, baina, ez du onerako joerarik, eta espedizioa uztea erabaki dute azkenean.
Hasieran, Gasherbrum Ieko tontorrera (8.080 m) igo nahi zuten Alberto Iñurrategi, Juan Vallejo eta Mikel Zabalza alpinistek, baina, eguraldi txarra zela-eta, Kukuczka-Kurticka bidetik Gasherbrum IIrako (8.035 m) bidea hartzea erabaki zuten. Herenegun abiatu ziren, baina bide hori ere utzi egin behar izan zuten atzo.
Kanpaleku nagusira jaitsi gabe bi mendiak lotzea zuten erronka, estilo alpinoan eta ohiko ibilbideetatik kanpo. Helburua bete gabe itzuliko dira etxera.
