Oso mugitua izan da Espainiako Vueltako seigarren etapa. Jesus Herrada espainiarrak (Cofidis) irabazi du, eguneko ihesaldian sartu eta eguneko azken mendatean, Ares del Maestraten indartsuena izanda. Dylan Teuns flandiarra (Bahrain) sailkatu da haren atzetik, zazpi segundora. Hain zuzen ere, Teuns da liderra orain, Miguel Angel Lopezengandik (Astana) 4.43ra baitzegoen, eta faboritoak 5.44ra iritsi baitira. Orain, lehena da sailkapen nagusian. 38 segundora du David de la Cruz (Ineos), eta minutu batera Lopez.
Teuns izan da eguneko onuraduna. Kaltetuak, ordea, Nicolas Roche (Sunweb), Rigoberto Uran, Hugh Carthy (Education First) eta Victor de la Parte (CCC) izan dira, erretiratu egin baitira, eroriko handi batean nahastuta egon eta gero.
Ostiralean, zazpigarren etapa jokatuko dute, Onda eta Mas de la Costa artean (Herrialde Katalanak). 183,2 kilometro ditu, eta bi zati oso ezberdin: aurreneko 80 kilometroak lauak dira, eta azkeneko ehunak oso gorabeheratsuak, bost mendate igoko dituztelako: Marianet —3,7 kilometro eta %5,5eko pendiza—, Eslida —sei eta %4,5—, Alcudia de Veo —4,2 eta %4,4—, Salto del Caballo —10,4 eta %4,6— eta Mas de la Costa —4,1 eta %12,3—. Azkenekoan amaituko da etapa, eta oso gogorra da, %25eko aldaparen bat baitu.
