Esnatu da Jonas Vingegaard (Jumbo-Visma). Espainiako Vuelta irabazteko faborito nagusia kalkulatzaile ibili da lehen astean, baina gaur erasoa jo, gainontzeko faboritoak atzean utzi eta bakarrik helmugaratu da Valdezcarayko eski estazioan amaitu den etapan. Bigarren garaipena du aurtengo Vueltan. Torstein Traeen liderrak hamazazpigarren amaitu du, Vingegaardengandik 1:46ra, eta elastiko gorriari eutsi dio.
Vingegaardek azken portuaren magalean jo du erasoa, helmugarako hamabi kilometro falta zirenean. Igoera ikusgarria egin du euripean, inork ezin izan dio jarraitu, eta gutxi falta izan zaio sailkapen nagusiko lidertza berreskuratzeko. Traeen 37 segundotara du.
Ihesaldirako egun aproposa zirudien, baina, Lidl-Trekek eta Q36k egindako lanari esker, azken mendatearen aurretik harrapatu dituzte ihesean ibili diren bost txirrindulariek. Azkenean, Jumbo izan da lasterketa hautsi duena: Jorgensonek azkartu du erritmoa, eta Vingegaardek biribildu du taldearen lana. Hasiera batean eutsi dio Cicconek (Lide-Trek), baina segundo gutxi batzuk besterik ez dira izan.
Vingegaarden atzetik, Pidcock (Q36) eta Almeida (UAE) izan dira indartsuenak, 24 segundotara. 1:02ra helmugaratu da Gall (Decathlon) eta 1:46ra gainontzeko faboritoak, tartean, zortzigarren, Markel Beloki (Education First).
