Kaikuk bigarrenez jarraian irabazi du Euskadiko Traineru Txapelketa

Une honetan ia ezinezkoa da Kaikuri irabaztea. San Miguel ligan ez dabil ondo, baina kupoen mugarik ez daukanean, Jose Luis Korta entrenatzaileak nahi dituen arraunlariak uretaratzeko aukera duenean, 'txapelketeta koadrila' ateratzen duenean, ia garaiezina da 'Bizkaitarra' ontzia. Euskadiko Traineru Txapelketa irabazi zuen atzo bigarrenez jarraian, Zierbenan, eta pronostikoak goitik behera bete. Txanda nagusian arraun egin zuen, eta lehen txanpa gogorra jota, lehen luzearen erdirako bizpahiru segundoko aldea zuen Hondarribia eta Urdaibairekiko. Aurreneko ziabogan, jada, bostekoa zen. Gero, berriz, abantaila handitu zuen palakadaz palakada. Hamabost segundokoa ere izan zen uneren batean. Atzean, berriz, lehia gogorra eduki zuten 'Bou Bizkaia' eta 'Ama Guadalupekoa' traineruek. Urdaibai, baina, Hondarribiaren kalean sartu zen azken metroetan, eta epaileek kanporatu egin zuten. Bigarren, baina, Orio izan zen, lehen txanda erraz irabazi eta gero. Hortaz, Kaikuk, Oriok eta Hondarribiak lortu dute Espainiako Traineru Txapelketarako txartela. Abuztuaren 7an eta 8an jokatuko da Pedreñako uretan.