Kirolhaerria jaialdia, Euskal Herri osoko egitura sortzeko abiapuntu

Euskal zazpi lurraldeak bilduko dituen egitura eratzeko abiapuntu izan nahian, hilaren 27an (igandea) Euskal Herriko kirolariek ekitaldia egingo dute Donostian, 'Kirolhaerria' izenekoa. Belodromoan izango da, 18:00etatik aurrera, eta jendetza bildu nahi dute -doakoa izango da sarrera-. Selekzioaren ofizialtasuna dute helburu.

Gaur eguerdian aurkeztu dute jaialdia, Belodromoan bertan. Han izan dira, besteak beste, Aimar Irigoien harrijasotzailea, Mikel Orbañanos arraunlaria, Felix Izeta xake jokalaria...

Eneko Olasagasti da ikuskizuneko zuzendaria. Koldobika Jauregi eskulturgileak ekitaldirako propio egindako harria altxatzen saiatuko dira bi harrijasotzaile jaialdian, Irati Anda eta Gorka Karapeto Belodromoko egitura eskalatzen ahalegingo dira, sokatira izango da, arraunlariak ergometroarekin, trontzalariak eta aizkolariak txalapartaren erritmoarekin ariko dira, trial erakustaldia egongo da, xakea ekitaldi osoan zehar...

Lehengo igandean Barakaldon (Bizkaia), BECen aritutako bertsolariek ere hartuko dute parte ekitaldian. Amets Arzallus bera gaurko aurkezpenean izan da.

1.700 kirolari baino gehiago dira dagoeneko aldarrikapenarekin bat egin dutenak. "Kirola egitean, Euskal Herria aintzat hartuz nazioartean, bakarka edo taldeka euskal herritar gisara aritzeko eta Euskal Herria ofizialki ordezkatuz parte hartzeko aukera izatea" nahi dutela adierazi dute eta, horretarako, zazpi lurraldeetako kirolariak "barnebilduko dituen tresna" sortzen saiatuko direla.

Belodromoko ekitaldian izateko dei egin diete herritarrei.