Kontxako Bandera: kale edo bale erlojuaren aurka

Ligako lanak egin ondoren, heldu da urteko ekitaldirik garrantzitsuena traineruentzat: Kontxako Bandera. Gizonezkoek gaur jokatuko dute Kontxarako sailkatzeko estropada (18:00, ETB1), Donostiako uretan, eta, ohi bezala, erlojuaren aurka ariko dira. 24 traineru izango dira datozen bi igandeetarako zazpi postu preziatuak eskuratzeko lehian. Urtero bezala, etxeko trainerua, Donostiarra alegia, zuzenean sailkatu da.

Azken urteetan, Getariak eta Ondarroak ez dute modu berean bizi izan Kontxako estropada. Esperantza ontziak sailkatzea lortu du azken hiru aldietan, eta Antiguako Ama, aldiz, kanpoan geratu da azken bietan. Getariak, gainera, sasoi bikaina osatu du, eta konfiantzaz gainezka helduko da gaurko estropadara. Ondarroak, berriz, bigarren txandan finkatzea lortu du, eta, denetarik izan badu ere, ondo aritu da aurtengo denboraldian.

Joanes Solozabal (Etxebarria, Bizkaia, 2005) Ondarroako arraunlaria da. Bizkaiko taldea zortzigarren postuan geratu da Eusko Label ligan, eta Solozabalek taldea zer moduz dagoen kontatu du: «Gogoz gaude. Denboraldi ona osatu dugu, eta datozen bi igandeetan Kontxan egon nahi dugu».

Getaria, berriz, laugarren izan da, eta, denboraldi erregularra eginda, ohorezko txandan finkatzea lortu du. Haritz Miralles (Getaria, Gipuzkoa, 1998) Getariako arraunlaria ere prest dago gaurko estropadarako: «Azken boladan ondo sumatu dugu geure burua, eta horri eutsi nahi diogu».

Erlojupeko jardunek parekatu egiten dituzte estropadak. Halaxe kontatu du Ondarroako arraunlariak, sailkatze estropadako lehia zer moduz ikusten duen galdetuta: «Parekatua izango da. Azken jardunaldietan sailkapenaren beheko aldean zeuden taldeek maila ona eman dute». Iritzi berekoa da Miralles: «Tentsio handiko estropada izaten da. Guztiok nahi izaten dugu hurrengo bi igandeetan arraun egin». 

Itsasoa bare egongo da gaur, baina ez zen hala izan Donostian jokatutako Eusko Label ligako estropadan. Orduko hura ere erlojuaren aurka jokatu zen, itsasoko baldintzak tarteko. Getaria bosgarren izan zen, eta Mirallesek gogora ekarri du egun hura: «Baldintza zailetan aritu ginen, eta, hori kontuan hartuta, esango nuke lan ona egin genuela. Gaurkoak ez du zerikusirik izango ordukoarekin». Ondarroa, berriz, seigarren izan zen, eta denboraldiko estropadarik onenetako bat jokatu zuen: «Eguraldi txarra zegoen egun hartan. Baldintza txarrak bazeuden ere, estropada ona egitea lortu genuen, eta ongi aritu ginen». 

Herriak bero

Eustaten arabera, 2026. urtearen hasieran 8.144 biztanle zituen Ondarroak, eta 2.931 Getariak. Biak ere oso herri handiak ez izanagatik, nortasun eta arraun tradizio handikoak dira. Hori dela eta, bi herrietako jarraitzaile ugari izango dira Donostian. Ligako azken estropada amaitu zenetik, sailkatze estropadan parte hartu behar duten taldeek Kontxan dute burua, baita herritarrek ere.

Aurreko egunetan hizketaldi asko izaten dira urteko estropada sonatuenaren inguruan, eta, horrekin batera, arraunlariek herritarren babesa ere nabaritzen dute. Solozabalek aurreko egunak zer moduzkoak izan diren kontatu du: «Herritarren babesa urte osoan sentitzen dugu, baina, Kontxako estropada hurbilduz doan heinean, giro berezia sumatzen da».

Getarian ere ez da gutxiagorako: «Jendea Kontxarako gogoz dago abuztuaren hasieratik. Kalean animoa ematen digute, eta hainbatek bandera ere jartzen dute balkoian. Hori ederra da. Herritar ugari gaude traineruan, eta hori gustuko du jendeak». 

Guztiek egon nahi dute Kontxan, baina gaur sailkatze estropada jokatuko duten 24 traineruetatik zazpi soilik arituko dira Kontxako Bandera irabazteko lehian.