Laurdenarekin, herren

Lautik hiru kalera. Horixe da Espainiako Kopako final-hamaseirenetako itzuliko partidek utzitako ondorioa. Portugaletek gaur jokatuko du bere partida, eta joaneko 1-1ekoarekin, Getafe estutzeko aukera txiki bat badaukate bizkaitarrek gaur Madrilen (20:00). Baina Osasuna, Reala eta Real Union Espainiako Kopatik kanpo daude dagoeneko. Hirurek galdu egin zuten, gainera, atzo, etxetik kanpo. Osasunak, partida txukuna egin arren, 2-1 galdu zuen Deportivoren zelaian, eta joaneko partidan 1-1 berdindu zutenez, galiziarrek egin dute aurrera. Realak ere txukun jokatu zuen atzo, baina 2-1 galdu zuen Almerian, eta 5-3 geratu zen azkenean kanporaketa. Eta Real Unionek, irabazten hasi arren, 6-1 galdu zuen gero Sevillaren aurka -joanekoan 0-4 galdu zuten gipuzkoarrek, eta 10-1 amaitu da kanporaketa-.

Portugaleteren ametsarekin, Athleticek soilik jarraitzen du bizirik Espainiako Kopan. Zuri-gorriek 0-1 irabazi zuten joaneko partidan, Alcorconen aurka, eta atzo ere 1-0 irabazi zuten. Ez zen partida ikusgarria izan -Alcorconek aukera politak izan zituen bigarren zatian-, eta Gabilondoren gola iritsi arte (26. min.), Aurtenetxeren aukera argi bat bakarrik izan zen jokaldi aipagarri bakarra. Distirarik gabe, baina askorik sufritu gabe egin zuten aurrera bilbotarrek.

1-0ekoarekin Igor Martinezek bigarrena sartzeko aukera izan zuen 55. minutuan, baina Alcorcon lotsagabe aritu zen hortik aurrera. Bisitariek hiru aukera on eduki zituzten, eta etxeko zaleak haserretu ere egin ziren. Baina Orbaizek 2-0ekoa lortu zuen 91. minutuan, eta gaitz erdi.

Osasuna hamarrekin, ezinean

Golen bat sartu beharra zeukan atzo Osasunak aurrera egingo bazuen, eta sartu zuen berea. Baina Rikik 53. minutuan sartu zuen golak ezerezean utzi zuen iruindarren ametsa. Rikiren golak, eta Sergioren txartel gorriak. Erdiko atzelaria atzo itzuli zen zelaietara, eta bigarren zatiaren hasieran, bost minuturen bueltan, bi txartel hori atera zizkion epaileak. Deportivok 1-0ekoa sartu eta Sergiok txartel gorria ikustea, biak bat izan ziren.

Bitxia bada ere, itxuroso ekin zion partidari Osasunak, eta atzeko lerroa asko aurreratuta, sufritzen hasi zen Deportivo. Gorritxoek bost korner izan zituzten alde lehen ordu erdian, eta bederatzi lehen zati guztian. Lekicek gertu eduki zuen 0-1ekoa 15. minutuan, eta Monrealek ere bai hurrengo minutuan, areaz kanpo egindako jaurtiketa baten bidez. Baina ondoen jokatzen ari zenean ez zuen golik sartu Osasunak, eta bat gutxiagorekin geratu zenean banakoa lortzeko gai izan zen Lekic, 62. minutuan -Osasunarekin lehen gola sartu zuen atzo aurrelariak-.

Hori bai, pozak oso gutxi iraun zien iruindarrei, Lassadek gol ikusgarria sartu zuelako bi minutu geroago. Vadocz saiatu zen azken unera arte 2-2koa sartu eta final-zortzirenetako txartela lortzen, baina saiakeran geratu zen guztia.

Osasunaren moduan, Realak ere 2-1 galdu zuen, eta iruindarren moduan, donostiarrek ere hainbestean jokatu zuten. Txukun hasi eta txukun amaitu zuten partida Martin Lasarteren jokalariek, baina joanekoan galdu zuten kanporaketa (2-3). 0-1 aurretik jarri eta Almeria estutzea zen Realaren asmoa, baina etxekoak jarri ziren aurretik atzo, 20. minutuan, Goitomen golari esker. Griezmann eta Sarpong hegaletan jarrita, eta Xabi Prieto punta-erdi lanetan ari zela, aukera onak sortu zituen Realak. Griezmannek argi-argia eduki zuen 8. minutuan, eta Sarpongek zutoinera bidali zuen baloia 30.ean. Baina 1-0ekoarekin amaitu zen lehen zatia, eta bigarrena hastearekin batera sartu zuen Ulloak 2-0ekoa.

Hiru gol behar zituen Realak luzapena behartzeko, eta Agirretxek 2-1ekoa lortu bazuen ere (50. min.), beste behin ere, hasterako geratu dira donostiarrak Espainiako Kopatik kanpo.

Real Unionen ametsa, berriz, ondo hasi zen, baina amesgaizto itxuran amaitu zen. Joaneko partidan 0-4 galduta, gozatzera joan ziren irundarrak Sevilla aldera, eta gozatuz hasi zuten partida, Romok korner batean sartutako golari esker (12. min.). Erabat nagusi izanda, ordea, sei gol sartu zituen gero Sevillak. Alfaro (15. min., penaltiz), Rodri (27. min.), Bernardo (41. min.), Cigarini (57. min.), Jose Carlos (73. min.) eta Acosta (85. min.) izan ziren golegileak.

Final-hamaseirenak

Kanporaketa Joanekoa Itzulikoa

Racing-Kordoba. 0-2. 3-1

Espanyol-Valladolid. 2-0. 1-1

Real Madril-Murtzia. 0-0. 5-1

Zaragoza-Betis. 1-0. 1-2

Sevilla-Real Union. 4-0. 6-1

Vila-real-Ejido. 1-1. 2-0

At. Madril-U. Las Palmas. 5-0. 1-1

Levante-Xerez. 3-2. 1-2

Deportivo-Osasuna. 1-1. 2-1

Almeria-Reala. 3-2. 2-1

Bartzelona-Ceuta. 2-0. 5-1

Athletic-Alcorcon. 1-0. 2-0

Getafe-Portugalete. 1-1. 20:00

Valentzia-Logroñes. 3-0. 21:00

Sporting-Mallorca. 1-3. 21:00

Malaga-Hercules. 0-0. 22:00

Portugaletek ezustean hartu nahi du Getafe, amets egiten jarraitzeko

Espainiako Kopako final-hamaseirenetan lehian geratzen den talderik apalena da Portugalete. Hirugarren Mailan jokatzen du Bizkaiko taldeak, baina hori ez da arazo izan maila handiagoko taldeekin nor baino nor aritu dadin. Orain bi aste La Florida estadioan gertatutakoa ikusi besterik ez dago. Getafek partida hasi eta berehala sartu zuen gola, baina etxeko taldea gai izan zen suspertu eta berdintzeko. Hala amaitu zen joaneko partida, banakoarekin, eta emaitza horrek oraindik aukera ematen die bizkaitarrei gaur Getafen (Espainia) ustekabea eman eta final-zortzirenetarako sailkatzeko. Javi Luaces Portugaleteko entrenatzailearen arabera, Getafek «%80ko aukera du» aurrera egiteko. Hala ere, ez dago jokatu aurretik amore emateko prest. «Normalena guk galtzea da, baina zergatik ezin dugu irabaztearekin amets egin?».