Osasunak beste urrats bat egin du bi urte geroago Lehen Mailara itzultzeko. Enrique Martin Monrealek entrenatutako taldeak Gimnastic kanporatu du maila nagusira igotzeko lehen kanporaketan. Joan zen asteazkenean, joanekoan, Sadarren, 3-1 irabazi zion, eta gaur, Nou Stadin, berriro hartu du mendean (2-3). Beraz, azken kanporaketa jokatuko du datorren astean. Asteazkenean, joanekoa jokatuko du, Sadarren, eta astebete barru, itzulikoa, etxetik kanpo. Noren aurka jokatuko duen falta da zehazteko. Kordoba edo Girona izango da aurkaria. Bi taldeok bihar 19:00etan jokatuko dute itzulikoa, Gironan (Herrialde Katalanak). Joanekoan, 2-1 nagusitu zen Kordoba.
Gaurko partidari dagokionez, gorritxoak nagusi izan dira berriz ere. Hala ere, etxekoek sartu dute lehen gola. Naranjok egin du, zazpigarren minutuan. Golak apur bat jota utzi du Osasuna, baina minutuek aurrera egin ahala, lortu du kolpeari buelta ematea. Hala, David Garciak banakoa sartu du 32. minutuan, buruz. Golak min handia egin dio etxeko taldeari, luzapena behartzeko gutxienez beste bi gol sartu behar baitzituen. Gorritxoak izan dira, ordea, bi gol sartu dituztenak. Javier Flañok, lehena, 54. minutuan, eta Mikel Merinok bigarrena, 74. minutuan. Muñizek jarraian sartutako golak ez du ezer aldatu.
