Ingalaterrako eta munduko klub historikoenetako bat da Liverpool. Garaipen asko dauzka, baina bat falta zitzaion: Premier League (betiko Ingalaterrako liga). Izen hori hartu zuenetik, 1992tik, Anfield estadioko talde mitikoa garaikur hori lortu gabe zegoen. Bart hautsi da zaleei bolada amaigabea eta luzea egin zaiena. Zazpi jardunaldi falta dira lehiaketa amaitzeko, eta dagoeneko txapeldun da Jurgen Klopp alemaniarrak zuzentzen duen taldea. Lehiaketaren izena gorabehera, 19. titulua da herrialdeko ligan.
Liga historikoa ari zen egiten Liverpool, koronabirusak etetera behartu baino lehen. Partida bakarra zeukan galduta 29 jokatu eta gero, eta etenaren ondorengo bi jardunaldi nahikoa izan ditu lehendik ere eskuetan zuen tituluaren jabe egiteko. Asteazkenean, 4-0 irabazi zion Crystal Palace taldeari, eta, atzo Manchester Cityk galdu egin zuenez Chelsearen aurka (2-1), 23 punturen koska dago bi taldeen artean.
