Biharko kanporaketan hamaika aizkolari ziren aritzekoak, baina Mindegia katarroarekin dago eta Jaunarena ere pattal dabil osasunez. Beraz, aukera gehiago izango dute hautagai nabarmenak ez direnek finalera sailkatzeko. Hiru txandatan lehiatuko dira.Iaz Vicente lau segundogatik geratu zen finaletik at. Otsagikoak iazko arantza sartua du. Gainera, aurtengo Euskadiko II. Mailako finaletik kanpo ere geratu zen, txapela janzteko hautagaietako bat zenean. Hain zuzen, bihar ariko diren hiru aizkolari sailkatu ziren bere aurretik: Aitor Senosiain, Erdozia eta Kañamares. Beraz, badu arrazoirik behingoz pozaldi bat hartzeko.Nazabal, Barberena eta Larretxea Euskadiko Maila Nagusiko finalean ere ariko dira, eta pentsatzekoa da Nafarroakoan jarduteko ere aukera guztiak dituztela. Antonio Senosiain iaz baino hobeto ari da aurten, eta ez zuen urrun izan Euskadiko Maila Nagusiko finalera sartzea. Bistan da gutxienez bi txartel irabazteko oso lehia polita izango dela.
Egur Sporten Etorkizuneko Aizkolarien Ligako finala
Murgian (Araba) jokatuko da final hori, bihar, 12:30ean, eta lau aizkolari gazte ariko dira lehian: Ugaitz Mugertza eta Arkaitz Iriarte Igertza gipuzkoarrak, Jose Angel Zubiaga arabarra eta Xabier Mindegia nafarra. Aitor Senosiain aritzekoa zen final horretan, baina ia ordu berean Nafarroako Maila Nagusiko kanporaketa jokatu behar du, eta horretan ariko da.
Bost proba izango dituzte Murgiako finalean eta 36 enbor ebaki beharko dituzte. Xabier Mindegiak du aitzakiarik onena ongi prestatuta egoteko igandean Nafarroako II. Mailako finala irabazi zuelako. Gainera, Urrezko Aizkolarien Lehiaketako Gazteen finalerdia jokatu zuen. Mugertzak Euskadiko Gazteen Txapelketa irabazi zuen.Iriartek ere jokatu zuen finalerdia Arria V.aren aurka. Zubiagak, berriz, Iriarteren aurka galdu zuen kanporaketa. Egur Sporten onenen zerrendan 3. da Mindegia, 4. Iriarte 5. Mugertza eta 9. postuan Zubiaga. Bestalde, Igantzin (Nafarroa), sei aizkolari gaztetxo ariko dira lehian, gaur, herriko jaiak direla baliatuta (19:00).
Biharko saioa
Txapelketa: Nafarroako Maila Nagusiko kanporaketa.
JAizkolariak: Donato Larretxea (Arantza), Floren Nazabal (Etxarri-Aranatz), Joxejuan Barberena (Beruete), Antonio eta Aitor Senosiain (Olague), Daniel Vicente (Otsagi), Juan Jose Lopez (Lezaun), Juanjoxe Erdozia (Etxarri-Aranatz) eta Manuel Kañamares (Arostegi).
Lana: bost pago-enbor, hots, bi kanaerdiko, bi 60 ontzako eta oinbiko bat.
Lekua: Etxarri-Aranazko pilotalekuan.
Ordua: 13:00.
-
Iazko denborak
1. Floren Nazabal 12 min 18 s2. Miel Mindegia 13 min 14 s3. Joxejuan Barberena 14 min 55 s4. Antonio Senosiain 15 min 17 s5. Donato Larretxea 15 min 36 s6. Daniel Vicente 15 min 40 s7. Juan Jose Lopez 17 min 00 s8. Aitor Senosiain 17 min 14 s9. Antonio Jaunarena 17 min 14 s10. Juanjoxe Erdozia 18 min 55 s
