Orain artekoa biribiltzera

Itxakok Txapeldunen Ligako aurreneko ligaxkako laugarren partida jokatuko du gaur, Austriako Hyporen aurka. Aukera polita dute Lizarrako jokalariek Europan urrats sendo bat egiteko aurrera. Une honetan B multzoko lehen postuan dira nafarrak, Alemaniako Leipzig taldearekin launa puntura berdinduta. Gaur garaipena lortzen badu, beraz, hurrengo faserako sailkatzeko aukera askoz hurbilago izanen du Itxakok.

Gaurko partida jokatzeko moduan izanen dira Naiara Egozkue eta Macarena Aguilar. Aguilarri, hain zuzen, hainbat minutuz aritzeko aukera eman zion Ambros Martin entrenatzaileak Murtziaren kontrako partidan, zortzi hilabetez belauneko lesio baten ondorioz pistatik at egon eta gero. Kontent da jokalaria berriz jokatzeko aukerarekin. «Oraindik nire sasoi fisikoa ez da onena, noski, baina pozik nago», erran du. Aurkariari buruz, kontuz ibili beharko dutela argi utzi du jokalariak.

Joaneko partidan 19-30 irabazi zuen Itxakok Hyporen aurka. Partida hartan, hala ere, funtsezko hainbat jokalari min hartuta ziren Austriako taldean. Gaurko norgehiagokarako Terese Pedersen atezaina berreskuratu du Hypok. Min hartuta jarraitzen du, ordea, Daniela Piedade pibotak. Lizarrako jokalarien artean, berriz, Raph Tervel da oraindik osatu ez den bakarra.

«Hypok Lizarran irabazten badu aukera anitz izanen du hurrengo faserako sailkatzeko; beraz, dena ematera aterako dira pistara. Hil ala biziko partida izanen da», azpimarratu du Aguilarrek.

Itxakorentzat ere garrantzi handikoa da gaurko norgehiagoka. Porrot batekin hasi zuen ligaxka, baina, geroztik, gora egin du nafarren jokoak, eta sumatu da emaitzek izan duten hobekuntzan. Txapelketa hasi aurretik protagonista izan nahi zutela erran zuen Ambros Martin entrenatzaileak, eta ari dira horretarako merituak egiten.



ITXAKO-HYPO

Txapelketa. Txapeldunen Ligako lehen ligaxkako laugarren jardunaldia.

Itxako. Navarro, Alizar, Barno, Alonso, Pinedo, Pena, Soit, Fer- nandez, Kurbanova, Barbosa, Azanza, Aramendia, Martin, Aguilar, Egozkue.

Hypo. Pedersen, Riesenhuber, Sanko, Do Nascimento, Lerant, Rotis-Nagy, Matushchkowitz, Plach, De Cararo, Goricanec, Hajgato, Ivancok, Kaiser.

Epaileak. Arntsen eta Gullaksen (Norvegia).

Ordua. 19:00etan Lizarrako kiroldegian (Canal 6, Teledeporte, Eurosport).