Orlandok gero eta gertuago dauka Boston, etxean Phoenix egurtu ondoren

Orlandok gero eta gertuago dauka Ekialdeko Konferentziako lehen postua. Atzo Phoenix Suns egurtu zuen etxean, 109-85, eta hirugarren garaipena lortu jarraian. Floridakoek 8-3 balantzea dute une honetan, eta garaipen bakarrera dute Boston (9-2). Phoenixek beste talde askoren arazoa izan zuen. Alegia, aurrena Miamiren aurka jokatzen dutela, eta hurrengo egunean edo bi egunetara, Orlandon. Sunshine State Tour delakoak (Eguzkiaren Estatuko Tourra) ikaragarri zailtzen du garaipena. Orlandon Dwight Howard izan zen onena. 30 minutu jokatuta nahikoa izan zuen, hogei puntu eta hamabi errebote lortzeko. Jameer Nelsonek laguntza ona eman zion: hamabost puntu eta hamabi asistentzia. Phoenix Steve Nash gabe ari da, eta zortzi onenetatik kanpo dago dagoeneko.

Phoenixen helburu berbera duten talde bik neurtu zituzten indarrak atzo: Portlandek eta Denverrek. Mendebaldean, ordea, ekialdean baino askoz estuagoa da borroka, eta Portland da zortzi onenen artean dagoen bakarra, nahiko balantze ona badu ere. Denver 86-83 mendean hartu ostean, 8-5 dago Portland, baina gertu sentitzen du bere postua nahi dutenen arnasa. Denver da horietako bat, 6-6 balantzearekin. Portlandek Brandon Roy izarra gabe jokatu zuen, baina irabazi egin zuen, LaMarcus Aldridgeri (24 puntu eta hamar errebote) eta Wesley Matthewsi esker (hogei puntu eta hamar errebote).

Clippersen ezina

Jardunaldiko azkeneko partidan, Indianak aise irabazi zion Los Angeles Clippersi 107-80. Clippers da NBAko talde kaskarrena, jokatutako hamahiru partidetatik hamabi galduta, eta marka da, aditu askoren ahotan ezustea eman zezakeen taldea baita. Joan den sasoian draft-eko lehena izan zenak, Blake Griffinek, atzean utzi du bere lesioa, urtebeteren ostean, baina haren bueltak taldeko bi makuluren lesioekin egin du bat: Baron Davis eta Chris Kaman. Haiek azkar bueltatzea beste erremediorik ez du Clippersek.