Garai hobeen abiapuntu izan daitekeen puntua eskuratu du Osasunak Mallorcaren aurka. Bere horretan, ez dio balio sailkapenean behar duen urratsa egiteko, baina berdinketa nola lortu duen ikusita, esperantzaz itzuliko da Iruñera. Izan ere, bi goleko desabantaila orekatzea lortu du, berandu erreakzionatu badu ere. 82. minutuan, 2-0 zen emaitza. Itxura guztien arabera, gorritxoek jarraipena eman behar zioten azken asteetako bolada txarrari. Bada, gauzak ilunen zirenean, ez diote utzi sinesteari, eta, adorez beterik, orekatu egin dute markagailua. Raul Garcia de Harok itxaropena hauspotu du, faltaz lehen gola eginda; eta luzapenean, heroi mozorroa jantzi du Boyomok. Haren gol akrobatikoak oso ataka zailetik atera du taldea.
Hain justu, Boyomori atseden ostean adierazi dioten penalti batek sartu du zuloan Osasuna. Oso erabaki zorrotza hartu du epaileak, kamerundarrak oso arin bultzatu baitu aurkaria. Gainera, jokaldi horretan gorritxoen aldeko falta bat izan da, baina bideo epaile laguntzaileak ez du ikusi. Muriqik ez du barkatu penalti puntutik, eta bigarren gola egin du jarraian. Jota geratu dira gorritxoak. Gehiegizko zigorra jaso dute. Haatik, Raulen falta jaurtiketa elektroshock baten gisakoa izan da, eta Boyomoren golak zoramena piztu du Osasunaren aulkian, baita Mallorcara bidaiatu duten zale gorritxo ugarien artean ere. Jokoari dagokionez, taldeak ez ditu zalantzak uxatu. Baina batzuetan, arbelean baino lehen, jokalarien gogoan askatzen da mataza. Gorritxoek adorea berreskuratu dute gaur, eta mugarri izan liteke hori.
Osasunak asko zuen jokoan, baita Mallorcak ere. Jaitsiera postuetako txingarrak gertuegi sentitzen zituzten biek. Eta tentsioak, ezinbestean, eragina izan du zelaian: aurkariaren jokoa deuseztatzea izan da bien lehentasuna. Sormena eta argitasuna zokoratuta geratu dira. Lehen zati osoan, Osasunak ez du jaurtiketarik egin atera, eta bakarra egin du Mallorcak, atsedena ate joka zela. Ordura arte, Sergio Herrerak ez du eskularruak zikindu beharrik izan. Gorritxoek ere apenas sortu duten arriskurik, eta Budimir desagertuta egon da. Kroaziarrak arazo fisikoak izan ditu azkenaldian, baina titular izango zen susmoa zuen Mallorcaren entrenatzaileak, Jagoba Arrasatek. Ez zebilen oker.
Abantaila handia da Budimirren gisako golegile bat edukitzea, baina erraztasunak eman behar zaizkio area barruan eragina izan dezan. Eta lehen zati osoan, Osasunak pare bat erdiraketa arriskutsu egin ditu bakarrik. Ordena mantentzea izan da gorritxoen xede nagusia, defentsan 5-4-1 itxurako egitura oinarri hartuta. Baloia lapurtu ostean, erasoak azkar antolatzen saiatu dira, itzulinguruak alde batera utzita. Haatik, oso arazo gutxi sortu diote Mallorcari. Etxekoak ere kamuts ibili dira, ekimena haiek izan duten arren. Blokeatua zegoen neurketa, eta ez zirudien atsedenaren ostean gidoia asko aldatuko zenik.
Ohartzerako, estu eta larri
Atsedenetik indarberrituta itzuli, eta aginte makila hartzeko prest agertu da Osasuna. Haatik, planak eztanda egin dio, Muriqik jarraian sartu dituen bi golen ondorioz. Bata penaltiz sartu du, eta bestea, gaizki defendatutako trantsizio batean. Gorritxoei bi gol egin dizkiete bost minutuan, joan zen astean Realaren kontrako derbian bezala. Bigarren zatiak amesgaizto bilakatzen zaizkie. Gaur, ordea, garaiz esnatu dira, beste partida askotan ez bezala. Alessio Liscik aldaketa erasokorrak egin ditu, alarma nola edo hala itzali ahal izateko. Taldea ezinean aritu da hainbat minutuz, baina itxaropena berreskuratu du 82. minutuan, Raulek faltaz sartutako golari esker. Ruben Garciak baloia ukitu, Raulek jaurti, eta sareetarako bidea hartu du, giza hesia gaindituta.
Boyomoren gola hamar minutu geroago iritsi da, luzapenean, suspense eta guzti. Izan ere, epaileak jokoz kanpo zegoela iritzi dio hasieran. Errepikapenak garbi erakutsi du oker zebilela. Gola balekoa izan da, eta Osasunak arindua hartu du.
Mallorca-Osasuna
Mallorca. Bergstrom; Maffeo, Valjent, Raillo, Mojica; Samu, Mascarell, Darder; Virgili, Mateo Joseph eta Muriqi.
Osasuna. Herrera; Osambela, Herrando, Boyomo; Abel Bretones, Ruben Garcia, Lucas Torro, Jon Moncayola; Aimar Oroz, Victor Muñoz eta Budimir.
Golak. 1-0: Muriqik, penaltiz (62. min.); 2-0: Muriqik. (66. min.); 2-1: Raul Garciak (82. min.); 2-2: Boyomok (92. min.).
