Osasuna esku hutsik itzuli da Bartzelonatik. Espanyol Osasuna baino hobea izan da, eta Carlos Romerok 52. minutuan sartutako golak eman dizkie hiru puntuak etxekoei. Catenak berdinketa lortzeko aukera paregabea izan du 92. minutuan, baina atzelariak ez du asmatu.
Lehen minutuetatik, Osasunak arazo ugari izan ditu baloia jokatuta ateratzeko. Espanyolen presioak ito egin ditu gorritxoak, gogotik sufritu dute, eta berdinketari eutsi badiote, Sergio Herreraren zenbait geldiketa bikaini esker eutsi diote. Minutuak pasatu ahala, ordea, hobera egin du Alessio Lisciren taldeak, eta gola ere gertu izan du Budimirrek, Victor Muñozen jokaldi baten ostean.
Bigarren zatia lehenengoa bezalaxe hasi da, etxeko taldea nagusitu da, eta une hori baliatu du gola sartzeko. Erdiraketa bat urrundu du Osasunako defentsak, baina baloia area ertzean geratu da, eta ederki errematatu du Romerok 1-0ekoa egiteko.
Golaren ostean pauso bat aurrera eman du Osasunak, baina ez du aukera argirik sortu luzapenera arte. Rosierrek erdiraketa zoragarria bidali du area txikira, Catenak nahikoa zuen baloia bultzatzearekin, baina atzelariak ez du asmatu. 92. minutua zen, eta ez da askoz gehiagorako denborarik izan. Osasuna garaipen bat eta bi porrot zakuan dituela iritsiko da datorren asteko etenaldira.
