Osasunak kargutik kendu du Ziganda

Jose Angel Ziganda (Larraintzar, Nafarroa; 1966) lehen entrenatzaile postutik bidali du gaur Osasunak, zuzendaritzak goizean egindako bileran erabaki duenez. Sei jardunaldi daramatzate Espainiako Lehen Mailan eta Osasunak oraindik ez du partidarik irabazi. Hirugarren denboraldia zuen hark Iruñeko klubeko lehen entrenatzaile, 2006tik zegoen -aurretik ere klubean aritu zen teknikari-. Osasunak ez du ordezkoaren izenik eman oraindik.

Zigandak arratsaldean adierazi du erabakiak ezustean harrapatu duela, ez baita Osasuna halako neurriak hartu zalea. Hain zuzen, duela 11 urte eta bost hilabete bidali zuen azkeneko aldiz entrenatzailea: Miguel Sola -taldea orduan Espainiako Bigarren A Mailan zegoen-.

Gaur arteko teknikariak uste du taldeak baduela gaia denboraldia sailkapenaren erdialdean bukatzeko.

Osasunak Ligan bi partida galdu egin ditu -azkena Racingen aurka, duela zortzi egun, 0-1; Valentziaren kontra galdu du bestea-, eta beste lau berdindu -Vila-real, Mallorca, Deportivo eta Numantziaren aurka-. Joan den asteburuan ez da Ligako jardunaldirik izan, selekzioen partidak zirela-eta. 16. postuan dago sailkapenean, Betis azkenetik bi puntura. Sporting Gijonen aurka ariko da hurrena, igandean, han.

Osasuna zuzentzen zuenetik lehendabiziko aldiz txistuak eta bere aurkako oihuak entzun zituen Zigandak Racingen aurkako partidan. Patxi Izko Osasunako lehendakaria haren alde azaldu zen: "Hau futbola da. Emaitzak txarrak direnean urduritasuna da nagusi. Zaleei pazientzia eskatu nahi diet. Ziur naiz Zigandak buelta emango diola egoerari. Ez naiz damutzen hari eman izanaz taldea zuzentzeko ardura. Konfiantza osoa dut beregan".

Jon Andoni Goikoetxea izan da Zigandaren laguntzailea, eta hark ere ez du segituko.