Denboraldiko lehen garaipenaren bila joan, eta esku hutsik itzuliko da Reala Oviedotik (Espainia). Ez hala merezi izan duelako, baina orain arteko bi partidetako hutsak egin dituzte berriz txuri-urdinek, eta garesti ordaindu dute. Sendotasuna falta izan dute atzean, eta fintasuna erasoan. Oro har, sentipen onak erakutsi ditu taldeak, baina futbolean golak balio du, eta gola sartu duen bakarra etxeko taldea izan da. Ongi jositako kontraeraso bat aski izan du hiru puntuei etxean eusteko. Hala, sasoiko lehen geldialdi luzea soilik bi punturekin igaroko du Realak, eta izango dute zer landua datozen bi asteetan.
Ezohiko hamaikakoa zelairatu du Sergio Franciscok. Punta erdi postuan kokatu du Oiartzabal, eta Oskarsson aritu da aurrelari lanetan. Apustuak funtzionatu dio. Reala askoz gehiago izan da lehen minutuetan, eta nahi eta ezin aritu da Oviedo, zelai erdia igaro ezinda. Baloia gehienean oinetan izan dute txuri-urdinek, eta sakontasuna ere topatu dute erasoan. Txinparta bereziarekin jokatu du Oskarssonek, mugimendu ugari eta interesgarriak egin baititu, eta horrek mesede egin dio taldeari. Dena den, azken metroetan zehaztasuna falta izan dute donostiarrek. Oviedoren areara erraz iritsi arren, gol aukera garbiagoak sortzea falta izan dute. Baloi geldia ere ez dute baliatu. Guztira sei korner atera dituzte lehen zati osoan, baina alferrik.
Aihen izan da areaz kanpotik jaurtitzen ausartu den lehena, 31. minutuan. Eskuinez jaurtiketa ona egin du, baina ozta-ozta joan zaio kanpora. Barrenetxeak eman dio jarraipena bolada horri hurrengo jokaldian, baina haren jaurtiketak ere ez du aterik topatu. Eta jarraian Oiartzabalek izan du oso gertu gola. Ezkerrez egin duen jaurtiketari erantzun aparta eman dio Oviedoko atezainak. Lehenago edo geroago, bazirudien gola gertu zuela Realak, baina Oviedok asmatu du azkenean. Aihenek toki arriskutsuan galdu du baloia, eta etxekoek ez dute barkatu kontraerasoan. Hassanek metro luzez gidatu du baloia, eta haren paseari erremate aparta eman dio Dendonckerrek, 40. minutuan. Gehiago merezi izan duten arren, atsedenaldira atzetik joan dira txuri-urdinak.
Egoera irauli nahian, gogotsu ekin dio Realak bigarren zatiari. Grina bereziarekin zelairatu dira bisitariak, eta erasoan murgildu dira erabat. Oiartzabalek gola sartzeko aukera izan du berriz ere 50. minutuan, baina atezainarekin egin du topo. Gola sartzeko zailtasunak begien bistan geratu zaizkie txuri-urdinei, eta, gainera, Oskarssonek min hartu du 55. minutuan. Haren ordez Karrikaburu zelairatu da. Brais Mendez ere atera da zelaira Marinen ordez. Aldaketek ez diote fruitu askorik eman taldeari. Gogoa eta grina bai, baina distirarik ez du izan Sergio Franciscoren taldeak. Lehen Mailara igo berria izanagatik ere, ofizioa ederki plazaratu du Oviedok, eta horixe aski izan du hiru puntuei eusteko.
OVIEDO-REALA
Oviedo. Aaron; Nacho Vidal, David Costas, Dani Calvo, Rahm; Dendoncker, Reina (Sibo, 73. min); Ilyas (Hassan, 31. min), Ejaria (Cazorla, 61. min); Ilic (Brekalo, 73. min) eta Fede Viñas (Rondon, 61. min).
Reala. Remiro; Aramburu, Zubeldia, Caleta-Car, Aihen (Sergio Gomez, 70. min); Gorrotxategi (Turrientes, 78. min), Marin (Karrikaburu, 56. min); Barrenetxea, Oiartzabal (Sucic, 78. min), Kubo (Guedes, 66. min); eta Oskarsson (Brais Mendez, 56. min).
Golak. 1-0. Dendonckerrek (40. min).
