Franco Pellizottik irabazi du gaur Italiako Giroko 17. etapa (Chieti-Blockhaus, 83 kilometro). Gainera, sailkapen nagusian hirugarren jarri da orain, Carlos Sastreren kaltetan.
Etapan bigarren Stefano Garzelli izan da; Pellizoti baino 41 segundo beranduago helmugaratu da. Danilo di Luca heldu da hirugarren -42ra- eta laugarren Denis Mentxov -48ra-.
Ibilbidea laburra izan da oso, baina bukaera behintzat, mendate gogor batean eduki dute. Igoerako azkeneko hamahiru kilometroek %7ko batez besteko pendiza izan dute.
Mentxovek segitzen du Giroko lider. 26 segundo kentzen dizkio Di Luca bigarren sailkatuari. Pellizotti dago hirugarren -2.00ra-, Ivan Basso laugarren -3.28ra-, Sastre bosgarren -3.30era-, Levi Leipheimer seigarren -4.32ra-.
Bihar, 18. etapa: Sulmona-Benevento (182 kilometro). 22,5. kilometroan bigarren mailako mendate bat izango dute.
Igandean amaituko da Giroa, Erroman, 14,4 kilometroko erlojupekoarekin.
txirrindularitza
