Joera aldatzen ari zela zirudien honetan, beste kolpe bat hartu du Realak. Mallorcaren eta Bartzelonaren aurka partida onak jokatu ostean, txuri-urdinek beraiek bezain pattal dabilen talde baten aurka galdu dute Anoetan, Rayoren aurka (0-1), eta datorren asteko etenaldira egoera oso txarrean iritsiko dira, jaitsiera postuetan: zortzi jardunalditan bost puntu soilik lortu dituzte.
Gaur aldaketa gutxi egin ditu Sergio Franciscok. Mallorcari irabazi zion hamaikakoa zelairatu du, aldaketa bakarra eginda: Guedes sartu du Take Kuboren postuan. Orkatilan duen lesioari buelta eman ezinda dabil japoniarra. Lehen zatian Guedes bera izan da Realeko jokalaririk arriskutsuena, baina ez du meritu handirik ere egin behar izan titulu hori eskuratzeko.
Nahi bai, baina arrisku gutxi sortu dute etxekoek erasoan. Rayok, beste hainbeste. Abagunerik argiena, ordea, madrildarrek izan dute, Gorrotxategik area ertzean galdu duen baloi bati esker. Gutxigatik joan da kanpora De Frutosen errematea.
Bigarren zatian hobeto zelairatu da Reala. Arriskua sortu du lehen minutuetan, lehen zatian baino gehiago agertu dira Barrenetxea eta Oiartzabal, baina, hala ere, ez dute arrisku gehiegi sortu. Oraintxe talde tristea da Franciscorena, eta horixe da zelaian ematen duen sentsazioa ere.
Espinoren gola
Minutuek aurrera egin ahala, geroz eta urduriago jarri dira jokalari txuri-urdinak, baita zaleak ere, eta kontraeraso batean iritsi da danbatekoa: Ratiuk egin du jokaldia hegaletik, eta erdiraketa bakar-bakarrik errematatu du Pacha Espinok, penalti puntuan. Remirok ukitu, eta barrura. 83. minutua zen.
Amaierara arte saiatu da Reala, baina bihotzez gehiago futbolaren bidez baino. Datorren bi asteak luzeak izango dira Zubietan.
