Bikain jarraitzen du Realak Imanol Alguacilen aginduetara. Lau partidatan eseri da aulkian entrenatzaile oriotarra, eta talde txuri-urdinak hiru irabazi ditu, eta bat berdindu. Bederatzi gol sartu ditu, eta alerik ez du jaso. Gaur astindua eman dio Atletico Madrili. Willian Josek sartu du lehen gola, aurreneko zatian, 27. minutuan, eta Juanmik bigarrena eta hirugarrena, neurketako azken txanpan, 80. eta 92. minutuetan, hurrenez hurren. Garaipenari esker, Realak bost puntura du zazpigarren sailkatua, Sevilla. Beraz, oraindik badu aukera Europarako sailkatzeko. Bost jardunaldi falta dira jokatzeko.
Alaves, ordea, esku hutsik geratu da Mendizorrotzan. Ez da Girona baino gutxiago izan, baina ez du asmatu izan dituen aukerak aprobetxatzen. Gainera, epaileak lau gol baliogabetu dizkio. Bisitariek bigarren zatian sartu dituzte bi golak: lehena, Aleix Garciak, 58. minutuan, etxekoen defentsaren eta Pachecoren hutsa baliatuta; eta bigarrena, Stuanik, penaltiz, 86. minutuan. Tomas Pinak gola sartu du 91. minutuan, baina ez da gehiagorako denborarik izan. Galdu arren, Alavesek oso gertu du mailari eustea. Izan ere, 11 puntu ateratzen dizkio Deportivori, eta hamabost puntu geratzen dira jokoan.
