Lasai zihoan Euskal Herriko Itzuliko laugarren etapa, baina dena aldrebestu du ustekabeko eroriko batek. Oletatik behera zihoazela, dozena bat txirrindulari erori dira. Horien artean zeuden Itzulia irabazteko hiru faboritoak: Jonas Vingegaard (Visma), Remco Evenepoel (Soudal) eta maillot horia soinean zeramana, Primoz Roglic (Bora). Hirurak erretiratu egin dira. Epaileek lasterketa neutralizatu egin dute helmugaraino. Ihesaldian zeuden sei txirrindulariak soilik lehiatuko dira etapa irabazteko. Denborak ez dira kontuan hartuko, eta ez da bonifikaziorik izango. Medikuak berriz ere lasterketara noiz itzuliko zain dago antolakuntza.
Oletako maldetan behera ari zirela erori dira tropeleko lehen postuetan zebiltzanak. Mikel Landak hartu du bihurgunea lehen postuan, lasai antzean, baina haren atzetik zihoazen beste zenbait txirrindulari errepidetik irten dira, eta horietako batzuek kolpe galanta hartu ere bai. Abiadura handian hartu dute bihurgunea, eta erori egin dira.
🚨 CAÍDA EN EL PELOTÓN🚨
— Itzulia Basque Country (@ehitzulia) April 4, 2024
Entre los caídos, Primoz Roglic, Remco Evenepoel, Quinten Hermans y Jonas Vingegaard
🏆 @bancosabadell
🔴 MORE INFO ⬇️
🔗 https://t.co/JABIxm2MWO#Itzulia2024pic.twitter.com/YnprHUo5Nr
Vingegaard erietxera eraman dute, immobilizatuta. Lepokoa jarrita eta oxigenoaren laguntzarekin sartu dute anbulantzian. Evenepoel altxa egin da, baina lepauztai inguruan min handia zeukan. Roglic ere erori da, atzo bezala. Jay Vine (UAE) ere erietxera eraman dute.
Ihesaldian zeuden sei txirrindulariek soilik jokatu dute etapa, bi euskal txirrindulari tartean zeudela: Joseba Lopez (Caja Rural) eta Mikel Retegi (Kern Pharma). Beste laurak hauek dira: Louis Mentjes (Intermarche), Mathieu Burgaudeau (TotalEnergies) Karel Vacek (Burgos-BH) eta Reuben Thompson (Groupama). Meintjesek irabazi du azkenean, bakarrik ihes egin ostean.
