Sasoiko bigarren garaipena Mark Webberrentzat, Britainia Handiko proban

Mark Webberrek urteko bigarren garaipena lortu zuen herenegun, Britainia Handiko Sari Nagusian, eta, hala, Fernando Alonsorekin batera bera da bitan irabazitako bakarra. Txapelketan bigarren zen australiarra, eta, irabazita, gerturatu egin zaio Alonsori. Aurreko urtekoa hobetu du momentuz Webberrek garaipen kopuruari dagokionez, eta txapelketan itxura hobea ematen ari da. Erregulartasunari eusten badio, titulua ez du urrun izango, Alonso eta Sebastian Vettel ahaztu gabe.

Atzerapauso nabarmena eman zuen McLarenek, eta txapelketari agur ez esateko, asko hobetu beharko du Alemanian, bi aste barru. Aurrean espero, eta atzean ibili ziren. Pneumatikoak bezala, guztiak ezustean harrapatu baitzituzten: gogorrenak ziren azkarrenak, tenperatura baxuari esker. Red Bullek nahiago du beroa. Horregatik, igandeko garaipena abisu modukoa da. Alonsok gertutik jarraituko die Webber eta Vetteli.