TXIRRINDULARITZA. Coppiren omenezkoak xarma galdu du

Emango du zeresana Giroko gaurko etapak, 10.ak. Ekitaldi honetako luzeena delako -262 kilometro- eta hiru mendate gainditu beharko dituztelako. Baina mendeurrenaren Giroan, Fausto Coppi Il Campionissimo-ren omenez antolatutako etapak xarma galdu du. Berez, Frantziako lurretan zen jokatzekoa etaparen erdia baino gehiago, baina arazo teknikoak medio, ezin izango dute 1949ko ekainaren 10ean jokatutako etapa berriz egin. Hartara, ibilbidea aldatu dute, eta, neurri handi batean gatz eta piperrik gabe geratu da gaurko saioa, distantzia 1949koaren bera izango den arren.

Orduan 19. etapa jokatu zen, Cuneo eta Pinerolo artean, gaur bezala. Adolfo Leoni zen liderra, baina Monzara -han bukatu zen Corsa Rosa urte hartan- heldu aurretik, handia egiteko, lasterketa irabazteko intentzioa zeukan Coppik. Colle della Maddalena, Vars, Izoard, Montgenevre eta Sestrieres mendateak igo behar zituzten txirrindulariek. Coppiren eta Gino Bartaliren arteko lehia handia zen garai hartan, baina errepidean kontrarioak bezala, bi txirrindulariak lagunak ziren bizikleta alboratzen zutenean.

Adiskidetasuna, ordea, beste baterako utzi zuen Coppik orduan. Colle de la Maddalena -Larche, frantsesez- igotzen ari zirenean jo zuen erasoa, eta gero, Pinerolon gauzatu zuen balentria. Bakar-bakarrik gainditu zituen etapako bost mendateak. Montegenevren ia zazpi minutuko aldea pilatu zuen; eta Sestrieresen, berriz, ia zortzikoa. Gero, helmugan, 11 minutu eta 52 segundo kendu zizkion Bartaliri, bigarrenari, eta maglia arrosa jantzi zuen. Ia 10 ordua behar izan zituen, eta batez besteko abiadura 27 kilometro ordukoa izan zen.

Baina Colle della Maddalena gainditzeko trabak jarri dizkiete antolatzaileei, eta, gainera, hor bertan irrati frekuentziekin arazoak edukiko zituztela ohartarazi zieten. Hortaz, etapa Italian jokatuko da oso-osorik.

Sailkapena

NAGUSIA

1. Danilo di Luca (LPR) 33.13.35

2. T. Lovkvist (Columbia) 13ra

3. Michael Rogers (Columbia) 44ra

4. Levi Leipheimer (Astana) 51ra

5. Denis Mentxov (Rabobank) 58ra

63. Iker Camaño (Fuji) 25.44ra

72. Iban Maioz (Xacobeo) 29.23ra

73. David Lopez (Caisse) 31.55era