TXIRRINDULARITZA. Triestekoa Venezian irabazi du

Berez, eta, hasteko, gaurko etapa, Italiako Giroko bigarrena, zeukan begiz jota Mark Cavendishek (Columbia High Road), egungo esprinterrik onenak. Jesolo-Trieste, 156 kilometrokoa. Laua eta oso aproposa Giroko aurreneko volatta jokatzeko. Baina Columbia High Roadek hegan egin zuen, atzo, Veneziako Lidoan korritutako taldekako erlojupekoan, Giroko lehen etapan. 21 minutu eta 50 segundo behar izan zituen ibilbideko 20,5 kilometroak betetzeko, eta 56,33 kilometro orduko batez bestekoa egin zuten. Harrigarria. Hortaz, Triestekoa Venezian irabazi zuen Cavendishek, eta bera da aurreneko liderra. Gainera, maglia arrosa jantzi duen Erresuma Batuko lehendabiziko txirrindularia da.

Faboritoak, Garmin-Slipstreamekoak, bigarren izan ziren sei segundo eskasera, eta Astana, hirugarren, 13ra. Garminekoek sasoi honetako helburua Giroko lehen etapa irabaztea zela esan izan dute, baina ezin izan zuten errepikatu iaz Sizilian (Italia) egindakoa. Columbia azkarragoa izan zen. Mark Cavendishek, Michael Barryk, Edvald Boasson Hagenek, Thomas Lovkvistek, Marco Pinottik, Morris Possonik, Mark Renshawk, Michael Rogersek eta Konstantin Siotsouk osatu zuten Columbiaren bederatzikoa.

Lasterketa irabazteko faboritoei dagokienez, Levi Leipheimerren Astana izan zen onena. Izan ere, eta segundo bakan horiek orain ezer gutxirako balio duten arren, bederatzi atera zizkion Danilo Di Lucari (LPR), 25 Denis Mentxovi (Rabobank) 27 Ivan Bassori (Liquigas), 29 Damiano Cunegori (Lampre), 36 Carlos Sastreri (Cervelo), eta ia minutua, 49, berriz, Gilberto Simoniri (Diquigiovanni).

Sailkapena

LEHEN ETAPA

1. Columbia-High Road 21.50

2. Garmin-Slipstream 6ra

3. Astana 13ra

4. LPR 22ra

5. ISD 27ra

6. Katusha 35era

7. Rabobank 38ra

8. Liquigas 40ra

9. Lampre 42ra

10. Milram 49ra

11. Cervelo d.b.

12. Barloworld 54ra

13. Team saxo Bank 55era

14. Caisse d'Epargne 58ra

15. Bouygues-Telecom 1.01era

16. Diquigiovanni 1.06ra

17. Quick Step 1.14ra

18. Xacobeo Galizia 1.19ra

19. Acqua&Sapone 1.21era

20. Silence-Lotto 1.22ra

21. Ag2r 1.35era

22. Fuji-Servetto 1.37ra