TXIRRINDULARITZA. Zulatuta, gorputza eta Vuelta

Peter Velits (Columbia). Gogoan hartu izen hori. 25 urte. Eslovakiarra. 2006an, Bratislavan (Eslovakia), 23 urtez azpiko Munduko Txapelketako erlojupeko probako txapeldun; 2007an, Stuttgarten (Alemania), 23 urtez azpiko Munduko Txapelketako errepideko probako txapeldun; iaz, Donostiako klasikoan, laugarren; aurten, Euskal Herriko Itzuliko hirugarren etapan, Amurrion, hirugarren... Garapen baten kontaketa da hori. Espainiako Vuelta zulatu duen txirrindulariaren datuak dira horiek. Ez Fabian Cancellara (Saxo Bank) eta ez Denis Mentxov (Rabobank). Haizeak haizatuta -nabarmen aldatu zuen norabidea arratsaldeak aurrera egin ahala-, Peter Velitsek irabazi zuen atzo Vueltako 46 kilometroko erlojupekoa, Peñafielen. Sailkapenenean zulo ederrak sortuta, gainera.

Hala ere, Vincenzo Nibalirena (Liquigas) izan zen zulaturik deigarriena. 8. kilometroan, dena emanda zihoanean, errepidearen ezkerreko marra zuria eskuinera utzita zihoanean, aurreko gurpila zulatu zitzaion. Oso arriskutsua da errepidearen zati hori, erabat zikin egoten delako. Eta hor zikindu zuen egiten ari zen erlojupeko txukuna. Izan ere, trakets ibili ziren zuzendaria eta mekanikaria; bat bizikletari gurpila aldatzen, eta bestea bizikleta aldatzen. Segundo ederrak galdu zituen italiarrak. Hori bai, lan txukuna egin zuen azkenerako, eta liderraren maillotarekin irtengo da gaur.

Joaquim Rodriguezi, berriz, gurpila ez, gorputza zulatu zitzaion. Maillot gorria jantzita, orain arte baino lan duinagoa egingo zuela pentsa zitekeen. Baina Velitsekiko 6.12 minutu galdu zituen helmugan. Jota amaitu zuen kataluniarrak. «Ilusio guztia galdu dut. Banekien gaizki nindoala». Nibalirekiko 3.44 minutura dago orain Rodriguez, bosgarren postuan, eta 1.45era dauka Velitsen hirugarren postua.

Mikel Nieve, 13. postuan

Velitsek etapa eta podiumeko hirugarren postua, eta Nibalik maillot gorria. Horiek dira atzoko bi garaileak. Baina Vueltako 17. etapak beste txirrindulari bat goratu du nabarmen: Ezequiel Mosquera (Xacobeo-Galicia). Lan ikusgarria egin zuen galiziarrak. Erreferentzia guztietan Nibalirengandik segundo gutxira zegoen, eta helmugan hemezortzi segundo besterik ez zizkion atera italiarrak. Bigarren postuan dago orain, 38 segundora, eta Bola del Mundoko etziko amaiera gogorra dauka alde. «Ez naiz ezkutatuko. Dena emango dudala hitz ematen dut». Vuelta irabazteko aukera paregabea dauka Mosquerak.

Mikel Nievek (Euskaltel-Euskadi) asko sufritu zuen atzo, eta 13. postura jaitsi da sailkapen nagusian. Taldeak bi urterako berritu zion atzo kontratua.

Sailkapenak

HAMAZAZPIGARREN ETAPA

1. Peter Velits (Columbia) 52.43

2. Denis Mentxov (Rabobank) 12ra

3. Fabian Cancellara (Saxo Bank) 37ra

4. Gustav Larsson (Saxo Bank) 50era

5. Luis Leon Sanchez (Caisse) 1.03ra

11. Xavier Tondo (Cervelo) 1.29ra

13. Carlos Sastre (Cervelo) 1.47ra

14. Thomas Danielson (Garmin) 1.53ra

15. Vincenzo Nibali (Liquigas) 1.55era

19. Ezequiel Mosquera (Xacobeo) 2.13ra

38. Nicolas Roche (Ag2r) 3.29ra

51. Frank Schleck (Saxo Bank) 3.55era

20. David Lopez (Caisse) 2.14ra

23. Imanol Erbiti (Caisse) 2.28ra

27. Gorka Verdugo (Eusk.) 2.39ra

78. Mikel Nieve (Euskaltel) 5.21era

80. Juanma Garate (Rabob.) 5.22ra

105. Joaquim Rodriguez (Katuxa) 6.12ra

NAGUSIA

1. Vincenzo Nibali (Liquigas) 71.19.50

2. Ezequiel Mosquera (Xacobeo) 38ra

3. Peter Velits (Columbia) 1.59ra

4. Frank Schleck (Saxo Bank) 3.43ra

5. Joaquim Rodriguez (Katuxa) 3.44ra

6. Xavier Tondo (Cervelo) d.b.

7. Thomas Danielson (Garmin) 3.54ra

8. Nicolas Roche (Ag2r) 4.02ra

9. Carlos Sastre (Cervelo) 4.12ra

10. Luis Leon Sanchez (Caisse) 5.42ra

11. David Garcia (Xacobeo) 7.18ra

12. Vladimir Karpets (Katuxa) 8.51ra

13. Mikel Nieve (Euskaltel) 9.23ra

14. David Moncoutie (Cofidis) 10.36ra

15. Vladimir Gusev (Katuxa) 12.17ra

34. Amets Txurruka (Eusk.) 43.36ra

44. David Lopez (Caisse) 1.07.26ra

57. Juanjo Oroz (Eusk.) 1.34.55era

83. Imanol Erbiti (Caisse) 2.03.26ra

91. Gorka Verdugo (Eusk.) 2.09.18ra