Urrutiak jakinarazi du Iraizozek ez duela jarraituko Athleticen

Gorka Iraizozek Athletic utziko du denboraldi honen amaieran, talde zuri-gorrian hamar urtez aritu ondoren eta ia 400 partida jokatu ostean —392 daramatza—. Atezain iruindarrari sasoi honen amaieran bukatuko zaio kontratua, eta, Josu Urrutiak atzo jakinarazi zuenez, ez du segituko. «Harekin bildu ginen, eta hamar urte hauetan izandako portaera eskertu. Datorren astean prentsaurrekoa egingo dugu», esan zuen atzo presidenteak. Hori lotuta, Urrutia «baikor» azaldu zen Kepa Agirrezabalagaren kontratua berritzeaz —2018ko ekainean amaituko zaio—.

Ernesto Valverderen etorkizunaz, berriz, adierazi zuen ez dagoela berririk, eta berriz azpimarratu zuen «gaur-gaurkoz» Valverde dela Athleticek izan dezakeen «entrenatzailerik onena», ez diela Bartzelonatik inor deitu, eta ez dutela beste inorekin hitz egin. Horren harira, Jose Angel Zigandaren lana goraipatu zuen. «Gure ereduarekin bat dator».