Osasuna utzi behar izan zuen Iara Lacostak (Zangoza, Nafarroa, 2001) bere «ametsa» betetzeko, beste zenbait nafar jokalarik bezala: Zugastik, Valerok, Facilak, Iribarrenek, Vilariñok… 15 urte zituela fitxatu zuen Osasunak, eta joan den sasoian aurreneko aldiz aritu zen Lehen Mailan, Espanyolekin. Lehen aldia zuen etxetik kanpo, eta, denboraldi «polita» izan arren, Zangozako aurrelariak etxetik gertu egon nahi zuen. Eibarren lehen fitxaketa izan da. Klubak hamabi jokalari fitxatu ditu guztira. Azkena, Opa Clement aurrelari tanzaniarra. Etzi ekingo diote ligari: Sevillaren aurka jokatuko du Eibarrek, Ipuruan.
Biharamun gozoa izango zenuten astelehenean, Euskal Herria Kopa irabazi ondotik.
Bai, oso pozik gaude. Euskal Herria Kopa irabazi dugu! Jokalari asko etorri berriak gara, eta debutatu eta garaikurra altxatzea… Nik Osasunan jokatzen nuenean, beti parte hartzen genuen, eta inoiz ez ginen finalera ailegatu. Eibarrekin lehenengoz finalera iritsi eta irabazteak ilusio handia piztu dit. Gainera, hemendik aurrerakorako konfiantza handia eman digu Realari eta Athletici irabazteak. Ligan lehenengo sei postuetan egoteko moduan dira, bi taldeek jokalari oso onak baitituzte.
Joan den denboraldian egin zenuen debuta gorenean, Espanyolen. Nola joan zen sasoia?
Denboraldi oso polita izan zen, eta aldi berean, oso bizia. Lehen aldia nuen etxetik kanpo, eta hiri handi batera joan nintzen, Bartzelonara. Guztiz berria zen dena, eta gainera, ez nuen taldeko jende askorik ezagutzen. Alderik onena hartu dut gogoan. Han zegoen jendeaz gogoratutako naiz, eta zelaian eta zelaitik kanpo ikasitako guztiaz. Harro nago zer-nolako denboraldia egin nuen ikusita.
Ez zen erraza izango Osasuna uztea eta etxetik kanpo joatea, familiakoengandik eta lagunengandik urrun.
Bai, gainera, denboraldi hartan, Osasunarekin Lehen Mailara igotzeko kanporaketako finala galdu genuen, hain justu Espanyolen aurka. Hortik bi hilabetera deitu ninduten hara joateko. Osasunatik joatea zaila da, inork ez baitu etxetik joan nahi, baina, azkenean, iritsi zen aurrerapauso bat emateko garaia. Hasieran, dezente kostatu zitzaidan. Gainera, denboraldiaurrean min hartu nuen, baina liga hasterako prest nengoen, eta sasoia oso arina egin zitzaidan.
Osasunako jokalari izandakoak Lehen Mailara salto egiten ari zarete, baina talde gorritxoa beheko mailan dago oraindik.
Bai, penagarria da hori. Osasunarekin lortu genuen guztia desagertu egin zen denboraldi batetik bestera, eta azkenean, hazi egin nahi genuen jokalariek alde egin behar izan dugu. Elkarrekin ere aipatu izan dugu pena ematen duela etxetik atera behar izateak gure ametsa betetzeko.
«Behetik gora egin dugu denboraldiaurrean. Hemendik aurrerakorako konfiantza handia eman digu Realari eta Athletici irabazteak»
Orain, etxetik gertu dagoen talde baten alde egin duzu berriro.
Bai, orain etxetik gertuago nago. Eta, gainera, Euskal Herriko futbola asko gustatzen zait. Niretzat lehentasuna etxetik gertu egotea zen, Espanyolen jarraitzeko aukera nuen arren. Niretzat garrantzitsua zen etxean egotea. Justu, Rocio Candal kirol zuzendaria fitxatu zuten; aurrez ezagutzen ninduen, niregan konfiantza zuen, eta bazekien etxetik gertu egon nahi nuela. Eta horrelaxe izan zen. Dei bat hartu, eta pozez zoratzen nengoen.
Aldaketa handiak izan dira Eibarren. Etorri berri direnetatik bakarren batek atentzioa eman dizu?
Etorri direnetatik, nafarrak bakarrik ezagutzen nituen, eta Ane Etxezarreta. Etorri berrien artean, Sarak [Martin] asko harritu nau, onerako, eta hemen zeudenetatik, Caminok ere bai, ez baitut denbora izan Eibar ikusteko. Amaia Iribarreni dagokionez, besteak beste, aspaldi zen ez nuela harekin jokatzen, eta ikusi dut asko hobetu duela; gero, Eunate [Astralaga] atezaina beste mundu bat da.
Sasoiaurreko emaitzei begiratuta, behetik gora egin duzue?
Uste dut behetik gora egin dugula, bai talde teknikoak, baita jokalariek ere. Oso talde gaztea gara, eta ikusten da gogoz eta anbizioz gainezka gaudela. Talde tekniko berria etortzearekin batera, egokituz joan gara, eta azken bi partidetan nabaritu da. Jokatzeko modua ez da lehen zuten berbera, baina antzekoa bai. Behetik gora egin dugu. Uste dut lehen lagunartekoetan ez ginela lehiatu, eta, azkenekoetan, aldiz, lehian ibili gara.
Jokatzeko moduari dagokionez, aipatu duzu ez dela askorik aldatu. Zer ekarpen egin diezazkioke Iñaki Goikoetxeak taldeari?
Denboraldiaurreko azken bi partidetan, ezagutzen genuen Eibar hori ikusi dugu. Bosteko lerroa atzean… Uste dut aurrean genituen aurkariek eragina izan zutela horretan. Izan ere, baloia dutenean oso ondo moldatzen dira. Haien kontra horrela lehiatu behar genuen: atzean talde sendoa osatu, eta kontraerasora azkar eta bizi atera. Ez dakit esaten zer izango den diferentea Yerai Martinekin alderatuta, ez bainintzen egon haren taldean, baina uste dut zuzenago jokatzen duten jokalariak ditugula orain, eta hor min handia egin diezaiokegula aurkariari.
«Lehen helburua mailari eustea da. Halere, anbiziotsuak gara. Nork daki? Beharbada sailkapenaren erdialdean dauden taldeengana gerturatuko gara»
Jokalari azkarra eta abila zarenez, eroso egongo zara horrela jokatzen.
Bai, Eibarren jokatzeko modua Osasunarenaren oso antzekoa du. Kontraerasora joatea eta zuzenago jokatzea gustatzen zait: atzelarien bizkarrera korri egitea, buruz buruko jokaldietan arriskua hartzea…
Eibarrek gorenera salto egin zuenetik, beti izan du helburu mailari eustea, baina azken bi denboraldietan sailkapenaren erdialdean geratu da.
Uste dut bide horretatik jarraitu behar dugula. Lehen helburua mailari eustea da, eta uste dut denok argi eduki behar dugula hori. Hala ere, anbiziotsuak gara. Nork daki? Beharbada sailkapenaren erdialdean dauden taldeengana gerturatuko gara. Bi liga egongo dira: batean, Bartzelona eta Real Madril daude, eta, bestean, beste denak. Gure aurkari zuzenak Espanyol, Deportivo, Alhama eta Logroño dira, besteak beste. Partida horiek dira irabazi beharrekoak.
Sevillaren aurka jokatuko duzue etzi. Ez da izango zure estreinako aldia Ipuruan, ezta?
Ez. Osasunarekin, orain dela urte dezente, lagunarteko bat jokatu genuen bertan. Eta Espanyolekin ere jokatu nuen, joan den denboraldian ere. Ipuruak ondo hartzen zaitu. Gazte batzuk bonboa jotzen ibiltzen dira. Jokatu genuen azken partidan, animatzen aritu ziren, eta zarata egiten . Zenbait nafar etorri gara taldera, gure lagunak eta familia etorriko dira animatzera, eta ziur naiz berezia izango dela. Badakigu partida irabaz dezakegula, eta Sevilla gure ligan egongo dela. Taldea prest ikusten dut. Energia handia emango liguke irabazteak.
