Valladolid, astebeteko bidaia gaiztoaren lehen geltoki zaila Baskoniarentzat

Baskoniak bere etorkizuna polita edo itsusia den argituko duen hiru partidako asteari ekingo dio gaur Valladoliden. Aste gaiztoa da, Gaztelako hiriburuan jokatu ondoren, Malagara eta Alacantera jo beharko dutelako arabarrek. Malagan, Top 16ko lehen partida dute zain. Alacanten, ligako bigarren itzuliko lehen erronka. Hiru partida horiek irabazita, bost garaipenera luzatuko luke bolada ona Dusko Ivanovicek zuzendutako taldeak, eta kopuru hori aintzat hartzeko modukoa litzateke. Lehen geltokia zaila da. Valladolidek Kopa jokatuko du, etxean oso sendo ari delako. Kopa lorpen historikoa da harentzat, eta garesti salduko du porrota.