Alejandro Valverdek (Movistar) irabazi du Frantziako Tourreko 17. etapa —Bagneres de Luchon eta Peyragudes artean, 142,5 kilometro—. Eguneko ihesaldian aurrean eutsi dion bakarra izan da, eta helmugan jarraian izan ditu Tour honetako bi jaun eta jabeak: Chris Froome eta Bradley Wiggins, hurrenez hurren.
Haimar Zubeldiak ez du egun onena izan, eta sailkapen nagusiko seigarren postura jaitsi da, postu bat galduta.
Hamabost txirrindulariko ihesaldia egin da eguneko lehen mendatean, Menteko igoeran, baina berehala hautsi da, batez ere Euskaltel-Euskadiko mutilen joarengatik. Euskaltelekoek jarrera bikaina agertu dute gaur ere, eta Egoi Martinez, Gorka izagirre eta Jorge Azanza aurreko taldean izan dira. Erasokor aritu dira, eta hala, ihesaldia hautsita igaro da eguneko azkenaurreko mendatetik: Valverde aurrean, Egoi Martinez eta Rui Costa gertu, eta Izagirre, Thomas Voeckler eta Fedrick Kessiakoff—biok mendiko sailkapenaren lehian— jarraian. Pelotoia, Liquigaseko gizonak tiraka zituela, batuta pasatu da Valverderengandik bi minutu ingurura.
Helmugako mendatea aurrean hasi du Valverdek. Atzekoen jazarpena antzua zen ordurako, eta berehala irentsi ditu pelotoiak. Izan ere, Liquigasek uneoro etapa garaipena bilatu du, eta lan eskerga egin du ihesaldikoak gehiegi urrutira ez zitezen. Baina Valverdek bereari sendo eusten zion, eta bi minutuko aldeari eusten zion.
Jelle Vanendert izan da pelotoian saiatzen lehenengoa, helmugatik hamar kilometrora; Jurgen Van den Broeck taldekideari bidea erakutsi dio, eta hau handik gutxira abiatu da Pierre Rolland eta Thibaut Pinot gurpilean zituela. Tartetxoa ireki dute, baina liderra bera, Wiggins jarri da onenen taldetik tiraka. Eta Froome taldekidea jarraian. Emanean-emanean, Skyko bi gizonak bakarrik gelditu dira aurrean, berriro, erakustaldia emanda.
Valverderi hurreratu zaizkion arren, hark berezko izugarria erakutsita garaipena lortu du. Hogei bat segundora helmugaratu dira Skyko bi gizonak, eta gainontzeko faboritoak, tantaka, ondorenean.
Bihar 18.etapa korrituko dute —Blagnac-Brive la Gaillarde, 222,5 kilometro —. Etapa eramangarria itxuraz, Pirinioak atzean utzita. Larunbateko erlojupekorako indarrak gordetzeko aukera izango dute faboritoek, eta etapa ehizerako azkeneko aukera iheszaleek.
17. etapako sailkapena
1. Alejandro Valverde 04:12:11
2. Christopher Froome (Sky) 19ra
3. Bradley Wiggins (Sky) 19ra
4. Thibaut Pinot (Fdj) 22ra
5. Pierre Rolland (Europcar) 26ra
6. Jurgen Van den Broeck (Lotto) 26ra
7. Vincenzo Nibali (Liquigas) 37ra
8. Tejay Van Garderen (Bmc) 54ra
9. Chris Horner (Radioshack) 1.02ra
10. Daniel Martin (Garmin) 1.11ra
Sailkapen nagusia
1. Bradley Wiggins (Sky) 78:28:02
2. Christopher Froome (Sky) 2.05era
3. Vincenzo Nibali (Liquigas) 2.41era
4. Jurgen Van den Broeck (Lotto) 5.53ra
5. Tejay Van Garderen (Bmc) 8.30era
6. Cadel Evans (Bmc) 9.57ra
7. Haimar Zubeldia (Radioshack) 10.11ra
8. Pierre Rolland (Europcar) 10.17ra
9. Janez Brajkovic (Astana) 11.00ra
10. Thibaut Pinot (Fdj) 11.46ra
Orain arteko etapak
- Aitzin-etapa. Irabazlea: Fabian Cancella. Liderra: Fabian Cancella.
- 1. etapa. Irabazlea: Peter Sagan. Liderra: Fabian Cancellara.
- 2. etapa. Irabazlea: Mark Cavendish. Liderra: Fabian Cancellara.
- 3. etapa. Irabazlea: Peter Sagan. Liderra: Fabian Cancellara.
- 4. etapa. Irabazlea: Andre Greipel. Liderra: Fabian Cancellara.
- 5. etapa. Irabazlea: Andre Greipel. Liderra: Fabian Cancellara.
- 6. etapa. Irabazlea: Peter Sagan. Liderra: Fabian Cancellara.
- 7. etapa. Irabazlea: Christopher Froome. Liderra: Bradley Wiggins.
- 8. etapa. Irabazlea: Thibaut Pinot. Liderra: Bradley Wiggins.
- 9. etapa. Irabazlea: Bradley Wiggins. Liderra: Bradley Wiggins.
- 10. etapa.Irabazlea: Thomas Voeckler. Liderra: Bradley Wiggins.
- 11. etapa. Irabazlea: Pierre Rolland. Liderra: Bradley Wiggins.
- 12. etapa.Irabazlea: David Millar. Liderra: Bradley Wiggins.
- 13. etapa. Irabazlea: Andre Greipel Liderra: Bradley Wiggins.
- 14. etapa. Irabazlea: Luis Leon Sanchez. Liderra: Bradley Wiggins.
- 15. etapa. Irabazlea: Pierrick Fedrigo. Liderra: Bradley Wiggins.
- 16. etapa. Irabazlea: Thomas Voeckler. Liderra: Bradley Wiggins.
- 17. etapa. Irabazlea: Alejandro Valverde. Liderra: Bradley Wiggins.
