Jaitsieretan makina bat ezbehar izan ditu Jay Vinek (UAE). Berandu iritsi zen txirrindularitzara, eta, teknika eta eskarmentu faltak eraginda, maldan behera danbateko handiak hartutakoa da. Esaterako, tartean harrapatu zuen iazko Itzulian izan zen eroriko larriak; areago, kaltetuenetako bat izan zen. Bada, mamu guztiak uxatu, eta preseski jaitsieran puskatu du gaur Vueltako seigarren etapa. Mendietan barneratu da lasterketa, baina Vine ez da maldan gora abiatu, azken-aurreko igoeratik igaro ostean baizik. Eguneko ihesaldian lekua egin, hogei kilometroren faltan bakarka abiatu, eta Paleko igoeran tinko eutsi die iheskide eta faboritoei.
Onenek lasai hartu dute etapa. Jonas Vingegaardek (Vismak) ez zuen lidergoa defendatzeko asmorik, eta bidea egiteko baimena eman die lasterketa buruan elkartu diren hamar txirrindulariei. Hortaz, ihesaldian oso sari mamitsuak zituzten jokoan: garaipenaz gain, maillotik preziatuena eskura zezaketen. Vine tokitan zegoen sailkapen nagusian. Torstein Traeenek (Bahrain), berriz, minutu bakarrera zuen lehen postua, eta ez du alferrik galdu aukera. Vineri ezin izan dio aurre egin; alabaina, atzean utzi ditu Lorenzo Fortunato (Astana), Bruno Armirail (Decathlon) eta Louis Vervaeke (Soudal), lidergoa eskuratzeko aukera zuten beste iheslariak.
2022an minbizia gainditu zuen Traeenek, eta azken bi urteetan momentu gozoak bizi izan ditu Bahrain taldean: etapa bat irabazi zuen iaz Suitzako itzulian —profesional gisa lortu duen bakarra—, eta gaur, itzuli handi baten buru ipintzeko ohorea izan du. Vinek, berriz, hirugarrenez altxatu ditu besoak Vueltan. UAEri denboraldiko 75. garaipena eman dio. Alabaina, dena ez da ona izan munduko talderik indartsuenarentzat: Juan Ayuso ezinean geratu da Palen, eguneko azken igoeran, eta 12 minutu galdu ditu; beraz, aurrerantzean, Joao Almeida izango da taldeko buruzagi bakarra.
Egitura bitxia zuen etapak. Izan ere, eguneko lau mendateak oso garbi banatutako bi bloketan zeuden banatuta. Hasieran Sentigosa eta Toses igo dituzte, eta, ia 80 kilometroko gune lauaren ondoren, mendate erabakigarrien ordua iritsi da: Comella eta Pal kateatu dituzte azken txanpan. Bada, Comellara iristerako, garbi zegoen ihesaldiak arrakasta izango zuela. Vinek apurtzeraino tenkatu du soka Comellako jaitsieran, eta minutu baten aldearekin ekin dio Pal igotzeari. Aise nagusitu da: 54 segundo atera dizkio Traeeni, eta 1.10 Fortunatori.
Faboritoek, berriz, lau minututik gorako atzerapena izan dute. Amaieran piztu da haien arteko lehia, Giulio Cicconeren (Lidl) ekimenez. Gurpilean eraman du Vingegaard, eta apurka-apurka, Almeida ere erantzuteko gai izan da. Faboritoek elkartzera egin dute helmugara iritsi aurretik. Mikel Landak (Soudal) minutu erdiko atzerapena izan du.
Luzeagoa ez ezik, gogorragoa ere izango da biharko etapa: 4.200 metroko desnibela pilatuko dute 188 kilometroko ibilbidean, lau mendate gaindituta. Helmuga Cerlerren egongo da. Lehen mailako mendatea da: 12,1 kilometro luze da, eta %5,8koa du batez besteko pendiza. Faboritoek gogo handiagoa erakutsi ezean, beste aukera on bat izango du ihesaldiak.
Froomeren istripu larria
Chris Froome (Israel) bi aldiz izan da Vueltako txapeldun, baina urrun geratu dira haren garai loriatsuak. Gain behera etorri da 2019an Dauphinen eroriko gogorra izan zuenetik, eta atzo istripua izan zuen entrenatzen ari zela. Lesio larriak zituela eraman zuten ospitalera: pneumotoraxa, eta bost saihets eta gerrialdeko orno bat hautsita. Azkenekotan zegoen haren ibilbidea, 40 urte bete baititu aurten. Agur tristea izango litzateke Tourra lau bider irabazi duen ziklista horrentzat.
Israelen aurkako protesta egin dute berriro
Atzo bezala, gaur ere hainbat manifestari errepidera atera dira Palestinako banderak eskuan zituztela, eta Israelen aurkako protesta egin dute. Oloten izan da (Katalunia). Tropela geldiarazi dute manifestariek. Israelgo taldeari boikot egiteko deia egin dute hainbatek, tartean Yala Nafarroa eta BDS mugimendua. Vuelta irailaren 2an eta 3an igaroko da Euskal Herritik.
