Vinokurov garaile berriro, itzuleran

Aleksandr Vinokurov (Astana) izan da gaur Frantziako Tourreko 13. etapako irabazlea -Rodez-Revel, 196 kilometro-. 2007an Tourrean bertan positibo eman zuen eta bi urte egin ditu zigortuta. Berriro itzuli da Frantziako probara, eta etapa bat irabazi du.

Atzo ere saiatu zen, baina ezin izan zuen. Gaur bai, bukaerako hirugarren mailako mendatean erasoa jo eta azkeneko zortzi bat kilometroak bakarrik eginda. 36 urte ditu. Hamahiru segundora heldu da tropela. Mark Cavendish geratu da etapan bigarren.

Vinokurovek 2003an irabazi zuen Tourrean bere lehen etapa. 2005ean bi eskuratu zituen. 2007an heldu zitzaion zigorra. 2006an Espainiako Vuelta lortu zuen. Aurten, Lieja-Bastogne-Lieja.

Joan Antoni Flecha, Sylvain Chavanel eta Pierrick Fedrigo izan dira beste protagonistak, etapa hasieratik hamar kilometro falta ziren arte ihes eginda egon direlako.



Bihar, 14. etapa: Revel- Ax 3 Domaines, 184,5 kilometrokoa. Pirinioetako aurreneko eguna izango da. Lehen mailako mendatean bukatuko da etapa, eta 30. kilometro lehenago maila berezikoa izango dute: Pailheres. Hurrengo egunetan ere mendiko etapak izango dira -kasu, ostegunean Tourmaleten bukatuko da-. Bihar zortzi amaituko da Tourra, eta aurreko egunean 52 kilometroko erlojupekoa izango dute.

Orain arteko etapak

- Aitzin-etapa: Rotterdam-Rotterdam. Irabazlea: Fabian Cancellara. Liderra: Fabian Cancellara.

- 1. etapa: Rotterdam-Brusela. Irabazlea: Alessandro Petacchi. Liderra: Fabian Cancellara.

- 2. etapa: Brusela-Spa. Irabazlea: Sylvain Chavanel. Liderra: Sylvain Chavanel.

- 3. etapa: Wanze-Porte du Hainaut. Irabazlea: Thor Hushovd. Liderra: Fabian Cancellara.

- 4. etapa: Cambrai-Reims. Irabazlea: Alessandro Petacchi. Liderra: Fabian Cancellara.

- 5. etapa: Epernay-Montargis. Irabazlea: Mark Cavendish. Liderra: Fabian Cancellara.

- 6. etapa: Montargis-Gueugnon. Irabazlea: Mark Cavendish. Liderra: Fabian Cancellara.

- 7. etapa: Tournus-Rousses. Irabazlea: Sylvaine Chavanel. Liderra: Sylvaine Chavanel.

- 8. etapa: Rousses-Morzine Avoriaz. Irabazlea: Andy Schleck. Liderra: Cadel Evans.

- 9. etapa: Morzine Avoriaz-S. Jean de Maurienne. Irabazlea: Sandy Casar. Liderra: Andy Schleck.

- 10. etapa: Chambery-Gap. Irabazlea: Sergio Paulinho. Liderra: Andy Schleck.

- 11. etapa: Sisteron-Bourg les Valence. Irabazlea: Mark Cavendish. Liderra: Andy Schleck.

- 12. etapa: Bourg de Peage-Mende. Irabazlea: Joaquim Rodriguez. Liderra: Andy Schleck.

- 13. etapa: Rodez-Revel. Irabazlea: Aleksandr Vinokurov. Liderra: Andy Schleck.