Thomas Voecklerrek (Europcar) irabazi du Frantziako Tourreko 10. etapa —Macon eta Bellegarde sur Valserine artean, 194,5 kilometro—. Bost txirrindulariz osaturiko ihesaldiko azkarrena izan da frantziarra. Luis Leon Sanchez, Dries Devenyns, Michele Scarponi, Jens Voigt eta Voeckler bera ziren ihesaldian. Eurak izan dira etapa hasieran aurrera egin duen 25 txirrindulariko taldetik garaipena jokatu dutenak.
Michele Scarponi izan da bigarren hiru segundora, eta Jens Voigt hirugarren, zazpira.
Atzean, Skyk lasterketa behar bezala kontrolatu du, eta pelotoiko onenak elkarrekin sartu dira helmugan. Pierre Rolland eta Jurgen Van den Broeck zertxobait lehenago sartu dira, azken kilometroetan aurrera eginda. Colombiere mendatean ez da mugimendu aipagarririk egon; Jurgen Van den Broeck saiatu da azken metroetan zuhaitza astintzen, baina berehala irentsi dute. Aldapa behera, berriz, Vincenzo Nibalik jo du Bradley Wiggins liderra estutzeko; alferrik, ordea. Izan ere, minututik gorako aldea lortu duen arren, berehala harrapatu du Skyren arrabolak.
Wigginsek jarraitzen du lider.
Bihar 11. etapa korrituko dute: Albertville-La Toussuire, Les Sybelles; 148 kilometro. Alpeetako etapa gogorrena ezbairik gabe, maila bereziko Madeleine eta Croix de fer, eta bigarren mailako Mollard igo beharko dituzte txirindulariek, lehenengo mailako La Toussuire mendatean amaitzeko. 70 kilometrotik gora egin beharko dituzte guztira aldapa gora; etaparen erdia.
Orain arteko etapak
- Aitzin-etapa (6,4 km-ko erlojupekoa) Irabazlea: Fabian Cancella. Liderra: Fabian Cancella.
- 1. etapa. Irabazlea: Peter Sagan. Liderra: Fabian Cancellara.
- 2. etapa. Irabazlea: Mark Cavendish. Liderra: Fabian Cancellara.
- 3. etapa. Irabazlea: Peter Sagan. Liderra: Fabian Cancellara.
- 4. etapa. Irabazlea: Andre Greipel. Liderra: Fabian Cancellara.
- 5. etapa. Irabazlea: Andre Greipel. Liderra: Fabian Cancellara.
- 6. etapa. Irabazlea: Peter Sagan. Liderra: Fabian Cancellara.
- 7. etapa. (lehen mailako mendatean bukatu da) Irabazlea: Christopher Froome. Liderra: Bradley Wiggins.
- 8. etapa. Irabazlea: Thibaut Pinot. Liderra: Bradley Wiggins.
- 9. etapa (41,5 km-ko erlojupekoa). Irabazlea: Bradley Wiggins. Liderra: Bradley Wiggins.
- 10. etapa (lehen mailako mendatean bukatu da). Irabazlea: Thomas Voeckler. Liderra: Bradley Wiggins.
