Weylandt garaile Giroan, Vinokurov lider

Wouter Weylandt-ek (Quick Step taldea) irabazi du gaur 93. Italiako Giroko hirugarren etapa -Amsterdam–Middelburg, 224 kilometro-, esprintean. Graeme Brown eta Robert Foster iritsi dira bigarren eta hirugarren.

Erorikoen ondorioz-eta, 30 laguneko taldea heldu da aurrenik, eta gaur ere lider aldaketa izan da. Cadel Evans liderrak 46 segundo galdu ditu -atzo lortu zuen maillota- eta Alexander Vinokurov (Astana) ipini da sailkapen nagusiko lehen tokian. Ivan Basso ere aurreneko multzoan sartu da. Vinokuroven atzetik, Richie Porte dago bigarren -denbora berean-, David Millar hirugarren -segundo batera-.

Bihar atseden eguna izango dute. Etzi, laugarren etapa: Savigliano-Cuneo, 33 kilometroko taldekako erlojupekoa.

Maiatzaren 30ean amaituko da Giroa, Veronan, 15,3 kilometroko erlojupekoarekin. Giroan zehar mendiko sei etapa egongo dira.