Txuri-urdina izango da Xabi Prietok (Donostia, 1983) bere ibilbide guztian jantziko duen elastiko bakarra. Izan ere, Realeko kapitainak denboraldiaren amaieran erretiroa hartuko du. Urte osoan zalantzan ibili ondoren iragan sasoian berritu zuen kontratua; Prietok, azkenean, futbol profesionala utziko du. Asteazkenean azalduko du erabakia prentsaren aurrean.
Prietorekin Realaren historiako ikur batek hartuko du erretiroa. 530 partida jokatu ditu txuri-urdinekin, eta bosgarrena da partida gehien jokatu duten jokalarien zerrendan: Gorriz, Larrañaga, Zamora eta Arconada ditu aurretik. Realean eginiko hamabost denboraldietan, Donostiatik irteteko eskaintza ugari izan ditu, baita Bigarren Mailako denboraldietan ere, baina denei ezetz esan zien.
Gaur egun min hartuta dagoen arren, sasoi honetan ere garrantzitsua izan da, ligako hogeita lau partida jokatu baititu eta hiru gol sartu. Guztira 74 gol sartu ditu Realarekin.
