Xalak eta Barriolak bolada ona luzatzeko aukera dute gaur, Mungian

Xala-Barriolak eta Berasaluze VIII.a-Apraizek binakako txapelketako hirugarren jardunaldiko azken partida jokatuko dute gaur, Mungiako pilotalekuan (17:00). Aspeko bikotea da faborito, orain arte jokaturiko bi partidak irabazi baititu. Asegarcekoak, berriz, bakarra. Bestalde, hurrengo asteburuko partidak ostiralean Irunen, larunbatean Iruñean, igandean Eibarren eta astelehenean Tolosan jokatuko dira. Irungoan, Titin III.a eta Pascualek Xala eta Barriolarekin neurtuko dituzte indarrak. Azken horiek, gaurkoa jokatu eta hiru egunera.