Irailean hasiko da aurten Zeelanda Berrian Munduko Rugby Txapelketa, eta Zeelanda Berriak gaur baieztatu du Fijiko armadan dauden selekzioko jokalariek ezingo dutela jokatu. Zeelanda Berriak Frank Bainimarama presidentearen erregimeneko kideei ez die herrialdean sartzen uzten, eta neurri horrek soldaduei ere eragiten die.
Sei dira Fijiko rugby selekzioak jokatzen duten soldaduak. Murray McCully Zeelanda Berriko Atzerri ministroak esan du ez duela politika hori aldatuko Bainimaramak giza eskubideen arloan eta erreforma demokratikoarenean aurrerapausoak eman arte.
2006ko abenduan Bainimaramak estatu kolpea eman zuenetik du indarrean Zeelanda Berriak debekua. Fijiko selekzioa final-laurdenetara iritsi zen 2007ko Munduko Txapelketan. Nazioarteko Rugby Federazioak jokatzen utziko zietela espero zuen, baina Zeelanda Berriak hartu duen erabakia onartzen duela esan du.
