Behin pertsona batek ohartarazi zidan zerbait edo norbait gorrotatzen nuela esatea gogorregia zela. Eta, egia esan, ez dakit gorrotatzeko gai naizen, enpatikoegia bainaiz. Hala ere, saiatzen banaiz, zerrendatu ahalko nituzke batere maite ez ditudan gauzak (baita pertsona batzuk ere). Baina ziur nago hau irakurtzen ari zaren horri ez zaizula askorik interesatzen zein den nire balizko higuinaren helburua…
Maider Uriartek gidatzen duen Gorroto podcasta, berriz, horretan oinarritzen da, gonbidatuen gorrotoetan, eta halakoek mundua mugiarazten duten baieztapenetik heltzen diote gaiari. Ze tuntuna naizen, nik beti pentsatu izan baitut maitasuna zegoela ekintza ausartenen atzean. Hala ere, oso proposamen ausarta eta originala iruditu zait Guaun eskaintzen den podcast horrena, ziur bainago gorrotatu ez arren gustuko ez ditugun hainbat gauza isil-isilik sufritzen ditugula, barruak jaten dizkigutenak. Ondo dago horiek askatzea, eta horretarako esan behar ditugu, ahoz azaldu ere.
Eta hori da, hain zuzen ere, Irati Erauskinek, Kilikik eta Jone Zalduegik egin dutena, psikologoaren aurrean egongo balira bezala. Lehenengoak ezkontzak eta haien inguruan dagoen parafernalia ditu jomugan; bigarrenak, berriz, gorrotatzaileak gorrotatzen ditu, bere burua horietako bat bezala hartzen badu ere, eta orain arteko azken gonbidatuak lagunen bikotekideak zein gogaikarriak izan daitezkeen komentatzen du… Entzun beharko ditugu hurrengo ataletan zeintzuk izango diren elkarrizketatuek dakartzaten gai higuingarriak. Hein handi batean, haiekin oso identifikatuta sentituko gara, dudarik gabe.
Hasieran esandakoa gezurtatuz, aitortu nahi dut gorrotatu izan dudala irratsaioan orain arte gonbidatutako hiru solaskideak nortzuk diren jakin ez izana, eta Interneteko orakulua kontsultatu behar izatea nortzuk ziren jakiteko. Are tristeagoa, hori gertatzen hasi zait ikasleek ekartzen dituzten komunikatzaile erreferenteekin, nik entzun ohi ditudanen aldean oso bestelakoak. Belaunaldien arteko arrakala! Eta agerian dago saioaren publikoa beste adin tartean kokatzen dela, trataturiko gaiak unibertsalak badira ere.
Bide batez, gaitik tiraka fenomeno berri batera heldu naiz, hate-watching (gorrotoz begiratzea) deiturikoa, telesaio eta sare sozialetako bideoekin lotutakoa antza. Nik ez dut gorroto-entzuketa praktikatzen, eta aditzen dudana gustuko ez dudanean diala aldatzen dut.
