Bisualki eta narratiboki distira handiko uneak baditu ere, Francis Ford Coppolaren Megalopolis gehiegizkoa eta handiustekoa da, sailkatzea ezinezkoa den obra bat. Pieza batzuk falta zaizkion buru-hausgarri baten antza du. 2024ko Zinemaldiko Perlak sailean ikusi nuen lehen aldiz, eta, estreinatu berri den dokumental baten aitzakian, bigarrenez ikusi dut orain.
Satira erretrofuturista moduko bat dela esan daiteke, non XXI. mendeko New Yorkek Mendebaldeko zibilizazioaren deskonposizioa islatzen duen. Coppolak ikuspegi hori Erromatar Inperioaren gainbeherarekin lotutako ikonografiaren bidez aurkezten du.
Coppolari ezin zaio ukatu bere ausardia eta zerbait erraldoia egiteko grina. Sare barik, konplexurik gabe eta anbiguotasunari muzin eginez egindako jauzia da. Guztia irregularra da, baina, aldi berean, guztia da izugarri epikoa.
Filmaren handinahia eta anbizioa txalogarriak eta nabarmenak diren arren, zaila da benetan ulertzea zer kontatu nahi duen eta zergatik egin duen modu horretan. Bigarren ikustaldian ere ahula iruditu zait, bere ideien pisuak eta forma ikusgarriak ezin baitituzte estali narrazioaren gabeziak.
Hasieran aipatu dudan bezala, dokumental baten aitzakian itzuli naiz film honetara; MegaDoc da lanaren izenburua, eta Filminera iritsi berri da. Mike Figgisek zuzendutako dokumental horrek Megalopolis-en filmaketa erakusteaz gain, proiektuaren atzean dagoen kaosa eta tentsioa ere agerian uzten ditu. Bada zerbait Coppolaren film bat baino handiagoa dena, eta hori haren ekoizpenaren historia bera da, eta dokumentalak zuzendariaren lanik handinahi eta polemikoenean murgiltzen gaitu.
Bertan, xehetasunez aztertzen dira zuzendariaren eta lantaldearen arteko gatazkak, baita Coppolak bere ikuspegi artistikoa gainerako kideei ezartzeko izan zuen etengabeko borroka ere. Inoiz egin den filmik zentzugabe bati buruzko begirada liluragarria eskaintzen du.
Bide batez, making of motako dokumentalak gustuko badituzu, ez galdu nire ustez ezinbestekoa den beste lan bat: Hearts of Darkness: A Filmmaker's Apocalypse, plataforma berean ikusgai. Dokumental bikain horrek Apocalypse Now filmaren ekoizpen luze, kaotiko eta problematikoa kontatzen du, eta zinemaren historiako filmaketa mitikoenetako baten barrura eramaten gaitu.
