Superilargiaren efektua izango al da? Ez dakit, baina aste honetan egun goibelak izaten ari naizela aitortu behar dut. Horregatik, gaur sentimendu honi aurre egiteko telesail paregabe bat gomendatu nahi dizut. Nik jada ikusia dut, baina zu ere egun grisak izaten ari bazara, HBO Maxen eskuragarri dagoen Somebody Somewhere gomendatzen dizut bihotza pixka bat alaitzeko.
Somebody Somewhere-k ez du efektu berezirik behar lilura sortzeko: bizitza arruntaren eguneroko xehetasunetatik abiatuta hunkituko zaituen telesaila da. Hannah Bos eta Paul Thureen gidoigileek sortua, eta Bridget Everett aktore, abeslari eta kabaretistaren bizipenetatik inspiratua, istorio horrek Sam izeneko emakumearen bizitza kontatzen du.
Sam Kansas estatuko bere jaioterrira itzultzen da ahizpa gaixoaz arduratzera; baina ahizpa hil ondoren, dolu prozesuan harrapatuta geratzen da, noraezean. Ingurune kontserbadore eta itogarri horretan, Sam ez da inon etxean sentitzen, harik eta Joel (Jeff Hiller) izeneko institutuko ikaskide zaharrarekin topo egiten duen arte.
Joelek erakutsiko dio posible dela bakoitzak bere lekua aurkitzea, baita Kansasen ere: herriko LGTBIQ+ kolektiboa ezagutzen duenean eta haien zeremonietan parte hartzean, Samek berriro aurkituko du bere burua, irribarrea eta abesteko gogoa.
Bigarren denboraldian, Mike Hagerty aktorearen heriotzak (Samen aitarena egiten zuena) ukitu bereziki hunkigarria ematen dio istorioari, galeraren eta onarpenaren gaiak are sakonago jorratuz.
Oro har, telesailak ez du melodrama handirik erabiltzen; alderantziz, egunerokoaren ñabarduretan oinarritzen da, eta horregatik da hain hunkigarria. Barre txikietan, afari deserosoetan edo bizitzaren errutinetan aurkitzen du edertasuna, eta horixe da bere sekretua: arruntasunean dagoen ezohikoa erakustea eta gertuko harremanak zaintzearen garrantzia azpimarratzea
Somebody Somewhere-k gaur egungo bizimodu azkarraren aurka egiten du: ez du distira edo zarata bilatzen, baizik eta egia, zintzotasuna eta gertutasuna. Eta horregatik, beharbada, egun goibelenetan ere argitxo bat aurkitzeko indarra emango dizu. Bizitza arruntari egindako maitasun kantua da —adiskidetasunari, barne-bakeari eta norbere burua maitatzeari buruzko oda txiki bat—. Bakoitzak bere burua hobeto eta gehiago maitatzera gonbidatzen duen telesail paregabea.
