'Astola' aldizkariko ikerketa lanak podcast bihurtu dituzte

Gerediaga elkarteak Durangaldeko (Bizkaia) historia eta ikerketa lanak jasotzen dituen aldizkaria argitaratzen du: Astola. Aldizkari horretako hainbat ikerketa lan podcast bihurtu dituzte orain. Edorta Barruetabeñak egokitu ditu lanak audio formatura. Zazpi lagun hauek jarri dituzte ahotsak: Felix Arkarazo, Tere Eguzkiza, Maite Berriozabal, Maite Lopez, Iñaki Guridi, Andoni Aizpuru eta Esti Gonzalez. Sarrerako ahotsa Miren Ezkurrak jarri du.

Zazpi podcastetan gai hauek sareratu dituzte: Iurretako Santa Apolonian lur hartu zuen hegazkina, Anboto Damari buruzko teoriak, Mikeldiko txerriari buruzko misterioa, Garaiko San Juan Momoition egindako aurkikuntzak, Durango kotxearen abentura, Elorrioko eskola esperimentala eta Durangaldeko leinuen gerrak. Beste hiru podcast ekoitziko dituzte aurten.